«Densaýlyq joly - 2015» aktsııasy sheńberinde jyljymaly medıtsınalyq keshender elimizdiń shalǵaıdaǵy aýyldaryna barady
ASTANA. QazAqparat - «Densaýlyq joly - 2015» respýblıkalyq aktsııasy sheńberinde 2015 jylǵy 3 jáne 9 tamyz aralyǵynda jyljymaly medıtsınalyq kesheńder (ári qaraı JMK) Mańǵystaý oblysy Munaıly jáne Mańǵystaý aýdandarynyń shalǵaıdaǵy aýyldaryna barady. Shebir, Shaıyr, 1, 2 jáne 3 Mańǵystaý aýyldarynyń turǵyndary tegin skrınıngtik tekserýden ótip, áleýmettik mańyzdy aýrýlar boıynsha aqysyz medıtsınalyq kómek alatyn bolady.Jumyldyrý toptarynyń quramynda okýlıstter, oftalmologtar, hırýrgtar, akýsher-gınekologtar, terapevtter, pýlmonologtar, pedıatrlar jáne kardıologtar bar.
Atalmysh kúnderi jyljymaly medıtsınalyq kesheńder Qyzylorda oblysy Qarmaqshy aýdanynyń 3-shi ınternatsıonal aýylyna, Qazaly aýdanynyń 6, sondaı-aq Jańaqorǵan aýdanynyń 3 aýylyna barmaqshy. Medıtsınalyq jumyldyrý brıgadalarynyń quramynda terapevtıkalyq, kardıologııalyq, endokrınologııalyq, ftızıatrlyq, onkologııalyq jáne salaýatty ómir saltyn qalyptastyrý qyzmetteriniń mamandary bar.
4 jáne 5 tamyz kúnderi Almaty qalasy medıtsınalyq uıymdardyń qyzmetkerleri aqparattyq-keńestik kómek kórsetip, «D-Market» ámbebap bazarynda zerthanalyq-dıagnostıkalyq tekserý júrgizetin bolady.
5 tamyz kúni jyljymaly medıtsınalyq kesheń Atyraý oblysy Isataı aýdany Hamıt Erǵalıev aýylyna barady. Aýyl turǵyndaryn beıindi mamandar qaraıtyn bolady. Sonymen qatar, laboratorııalyq jáne aspapty zertteýler de uıymdastyrylady (ÝDZ, EKG, rentgen). Poıyz - bul jyljymaly emhana. Kardıolog kabınetinde qajetti medıtsınalyq jabdyqtyń barlyǵy bar. Nevropatolog kabınetinde jańa nevrofızıologııalyq apparat, ÝDS-apparaty, doplerografııa men ehoentsefaloskop ótkizýge arnalǵan apparat bar. Bul medıtsına qyzmetkerlerine bas mıy tamyrlarynyń jaǵdaıyn tekserýge múmkindik beredi. Klınıkalyq-dıagnostıkalyq zerthana zamanaýı medıtsınalyq qondyrǵylarmen jaraqtandyrylǵan. Oftalmolog kabınetinde kózdiń ishki qysymyn ólsheıtin baılanyssyz tonometr, kózdiń refraktsııasyn anyqtaıtyn keratorefraktometr bar.
Esterińizge sala keteıik, aýyl turǵyndaryna salaýatty ómir saltyn qalyptastyrý máseleleri, áleýmettik mańyzdy aýrýlar boıynsha oqý-aqparattyq jáne tájirıbelik kómek kórsetý maqsatynda aǵymdaǵy jylǵy 1 shilde men 31 tamyz aralyǵynda respýblıkanyń barlyq óńirinde «Densaýlyq joly - 2015» keń kólemdegi aktsııasy ótip jatyr.
