DENSAÝLYQ: Jıi qan tapsyratyn jan júrek aýrýynan aman bolady - A.Muratbekov
ASTANA. QazAqparat - Qazaqstanda jyl saıyn 200 myń lıtr qoıytylǵan qan, 80 myń lıtr plazma, 60 myń lıtr quramynda erıtrotsıti bar orta jáne shamamen 18 myń trombokontsentrattyń emdik dozalary daıyndalady. Biz úshin bul qan qyzmetindegi kóp kórsetkish bolyp kóringenmen, 100 paıyz qajettilikti óteý úshin tym az kórinedi, dep jazady «Almaty aqshamy» basylymy.
Gazet tilshisi N.Baısaqaldyń jazýynsha, qazirgi tańda bizde 1000 aýrýǵa 18 donordan keledi. «Qan tapsyrý- adam densaýlyǵyna óte paıdaly. Jıi qan tapsyryp turatyn adamdar arasynda júrektiń ıshemııalyq aýrýlary óte sırek kezdesedi, qannyń qyzyl jasýshalary jańaryp otyrady. Sondaı-aq, ulpalyq metabolızmdi jáne gaz almasýdy jaqsartady. Immýnıteti jaqsarady. Qan aınalymyndaǵy toksınderdiń joıylýyna múmkindik beredi. Kóbinese biz qandy týǵan-týystarymyz, bolmasa, jaqyn jandarymyz aýyryp nemese qaıǵyly jaǵdaıǵa tap bolǵan jaǵdaılarda tapsyramyz, al jalpy kez kelgen adam óz erkimen qan tapsyryp, donor bolýyna bolady. Donor degen sózdiń syılaý degen maǵynany bildiretinin eskersek, qan tapsyrý arqyly basqa adamǵa ómir syılaıtynymyzdy umytpaǵan jón. Adamǵa ómir syılaýdan asqan qandaı qaıyrymdylyq bolsyn», -deıdi Almaty qalalyq Qan ortalyǵynyń Donor jınaqtaý bóliminiń meńgerýshisi, ekinshi sanatty transfýzıolog-dáriger Amankeldi Muratbekov atalǵan maqala boıynsha basylymǵa bergen suhbatynda.
