DENSAÝLYQ: Jaz aılarynda álsizdikten qalaı qutylýǵa bolady?
ASTANA. QazAqparat - Kún ystyqta jumys isteý áste qıyn. Álsizdik paıda bolady ári mı jumys isteý qabiletin báseńdetedi. Osy ýaqytta mıdyń qyzmetin keı azyq-túlik retteı alady. Bul azyqtardy tek jumys kúnderi ǵana emes, demalys kúnderi de ratsıonǵa qosyp turý kerek, dep jazady «Massaget» portalynyń densaýlyq aıdarynda.
Іnjir
Bul jemis tátti ǵana emes, paıdaly. Onyń quramyndaǵy kalıı gıpertonııa aýrýynyń aldyn alady. Mı jasýshasyndaǵy júıke serpininiń tasymalyn jaqsartady. Іnjir quramyndaǵy V6 dárýmeni mı qyzmeti úshin mańyzdy. Adamnyń kóńil-kúıine jaýap beretin dofamın jáne serotonın sekildi gormondardyń bólinýine septigin tıgizedi.
Qara jıdek
Qara jıdek kózge óte paıdaly. Oǵan qosa, jaz kezinde mıdyń jumys jasaý qabiletin arttyrady. Ásirese, Altsgeımer jáne Parkınson aýrýlarynyń aldyn alady. Adamnyń jasy kelgende, zeıini tómendeıtini belgili. Qara jıdek osy kezde meılinshe septigin tıgizedi. Onyń quramyndaǵy flavonoıdtar este saqtaý qabiletin arttyrady. Eger jıi jep tursańyz, logıkalyq, matematıkalyq esepteýlerdi de ońaı sheshe alasyz. Tańǵy asqa jelingen bir kese qara jıdek kúni boıy mıdyń jaqsy jumys jasaýyn qadaǵalap otyrady.
Shokolad
Ol - mıǵa qýat beretin mańyzdy taǵam. Ásirese, kúızelis kezinde qara shokolad jeseńiz, tynyshtyq syılaıdy. Bul - bir. Ekinshiden, tátti. Demek, quramynda glıýkoza kóp, glıýkoza mıdyń jaqsy jumys jasaýyna septigin tıgizedi. The Journal of Proteome Research jýrnalynyń júrgizgen saraptamasynda tájirıbege qatysqan adamdar eki apta ishinde, tańerteń jáne keshke 40 g qara shokoladtan jep júrgen. Keıin olardyń aǵzasyndaǵy kortızol - kúızelis gormonynyń tómendegenin baıqaǵan. Sonymen qatar, shokolad endorfın, serotonın sekildi pozıtıvti kóńil-kúı garmonynyń bólinýine sebepshi bolady eken.
Gıppokrat «Mı saý jáne kúızelisten alshaq bolǵanda ǵana adam durys oılaıdy» degen. Mıdyń durys jumys jasaýy - sizdiń qolyńyzda.
