DENSAÝLYQ: Tústen keıin uıyqtaýdyń paıdasy mol
ASTANA. QazAqparat - Adam kúnine 7-8 saǵat uıyqtaýy tıis. Osy qaǵıdany kópshilik bir uıyqtaǵanda 7-8 saǵat uıyqtaý kerek eken dep túsinedi. Osy normany kúndiz jáne túnde dep bólý kerek, dep jazady «Massaget» portalynyń Densaýlyq aıdarynda.
Mysaly, 5-6 saǵat túnde uıyqtasańyz, qalǵan ýaqytty kúndizgi ýaqytqa qaldyryńyz. Sebebi, tús mezgilindegi uıqy:
Zeıindi ashady
Sońǵy zertteýler boıynsha, tańda 20 mınýt uıyqtaǵanǵa qaraǵanda, tústen keıin 20 mınýt uıyqtaǵan paıdalyraq ekeni dáleldengen. Mysaly, NASA agenttigi ushqyshtar men ǵaryshkerlerdiń tús mezgilindegi 20 mınýttyq uıqysy jumysqa degen qabiletin 34%, al zeıinin 100% arttyrǵanyn baıqaǵan.
Kúızelisti joıady
Kúndizgi uıqy aǵzadaǵy kúızelisten bólingen gormondardyń kólemin azaıtady jáne emotsıonaldy kúshten qorǵaıdy. Eger tynyqqyńyz kelse, tynysh ári qolaıly jer tańdańyz.
Júrek aýrýlaryn azaıtyp, qysymdy birqalypta ustaıdy
Ǵalymdar esh jerińiz syr bermese de, kúndiz bir ret kóz shyrymyn alý kerek deıdi. Sebebi, bul - bolashaq saý ómir kepili. Kúndizgi ýaqytta 15-20 mınýt kóz ilip alýdy daǵdyǵa aınaldyrsańyz, qan qysymyńyzdy bir rettilikke keltiredi ári júrek aýrýlaryn 37% azaıtady. Sonymen qatar, aǵza jasýshalarynyń qalpyna kelýine kómektesedi.
Este saqtaý qabilet artady
Ǵalymdar uıqydan oıanǵan adamnyń mıyn qurǵaq ydys jýǵyshqa (gýbka) teńeıdi. ıAǵnı, qurǵaq ydys jýǵysh sýdy tez sińirse, tynyqqan mı da aqparattardy tez qoryta alady. Sondyqtan, oqýshylar men stýdentterdiń kúndiz bir ret tynyǵyp alǵandary durys. Árıne, dáris ústinde emes. Bastysy - óz-ózin tejeý. Kúndiz uıqy qanǵansha 2-3 saǵat uıyqtaý keri áser etedi.
Fızıkalyq belsendilikti arttyrady
Tústen keıin 20 mınýt uıyqtap alý sportpen jáne fıtnespen belsendi túrde aınalysatyn adamdarǵa mindetti túrde qajet. Tipti, túnde 8 saǵat uıyqtap júr degen kúnniń ózinde, túski ýaqytta kóz ilý sharshaýdy basady, kúnniń ekinshi bóligine belsendilik syılaıdy.
