Densaýlyq: Tar shalbar qanshalyqty zııan?
ASTANA. QazAqparat - Búginde amerıkalyq brendke aınalǵan djınsy shalbarlaryn kımeıtin adam álemde kemde-kem. Al qyzdar arasynda sánge aınalǵan tar djınsy shalbarlardyń zııan ekenin dárigerler eskertip, búginde dabyl qaǵyp otyr.
Júrgizilgen zertteýdiń nátıjesi boıynsha, únemi tar shalbar kıip júretin adamdardyń densaýlyqtarynda aýrýdyń birneshe túri kezdesedi eken. Olardyń basy jıi aınalyp, nesep joldary aýrýlaryna shaldyǵady. Vashıngtondyq dáriger Karen Boıldyń aıtýynsha, tar shalbarlar nevrıt aýrýyna, júıkeniń qabynýy men jambas tamyrlarynyń qysylýyna ákelip soǵady.
Nevrıtke shaldyqqan adamnyń jambasynda shanshý paıda bolyp, aıaǵy jıi uıyp qala beretin bolady. Dárigerler sondyqtan, jas qyzdardyń tar djınsydan kóri jumsaq matadan tigilgen shalbarlardy kıgeni abzal dep keńes berip otyr.
Sonymen qatar, er kisilerge de djınsydyń tıgizetin aıtarlyqtaı zııany bar. Eger tar djınsy shalbar kıse, onda belden tómen ornalasqan tamyrlar qysylyp, qalypty jumys isteýin toqtaýy múmkin. Bul óz kezeginde jynys múshesiniń túrli aýrýlaryna soqtyrady. Sondyqtan, er azamattarǵa da tar emes, erkin shalbar kııýi kerek. Djınsydyń erlerge arnalǵan keń tigilgen túrleri bar, al, áıelderde mundaı tańdaý joqtyń qasy.
Kerek keńes Massaget portalynan alyndy.
