Densaýlyq saıabaǵy ashyldy
ASTANA. Aqtóbe - Aqtóbede elimizdegi alǵashqy densaýlyq saıabaǵy ashyldy. Óńirde turǵyndar densaýlyǵyn saqtaý, olardyń salaýatty ómir saltyn ustanýyna jaǵdaı jasaý maqsatynan týyndaǵan ıgi sharaǵa oblys basshysy Berdibek Saparbaev bastamashy bolyp, ol densaýlyq saqtaý qyzmetkerleri tarapynan belsendi qoldaý tapqan bolatyn. Endi mine, oblys ortalyǵyndaǵy 1,4 gektar alańda ornalasqan biregeı mádenıet jáne demalys ortalyǵy kópshilikke qaqpasyn aıqara ashty.
«Memleket basshysynyń qoldaýynyń arqasynda qazirgi tańda oblystyń densaýlyq saqtaý júıesi medıtsınalyq qyzmet kórsetýdiń jańa, sapaly deńgeıine shyǵyp, halyq densaýlyǵyn nyǵaıtýda oń nátıjelerge qol jetkizdi. Bul turǵyda materıaldyq-tehnıkalyq bazany jetildirý, kadr áleýetin arttyrý máselesine jiti kóńil bólinýde. Medıtsına qoǵamdastyǵy kúndelikti tájirıbede Elbasy alǵa qoıǵan basym mindetterdi oryndaı otyryp, sala baǵdarlamasyn júzege asyrýǵa mol kúsh-jiger jumsap keledi. Qurylys boıynsha barlyq shyǵyndy Aqtóbe qalasy men oblys aýdandarynyń medıtsına mekemeleri kóterdi. Sóıtip, kópshilikke jańa ári jan-jaqty qamtylǵan saıabaq usynyp otyr. Dárigerlerdiń tek kúndelikti medıtsına máselelerimen ǵana aınalyspaı, salaýatty ómir saltyn ustanýǵa múmkindik beretin ınfraqurylymdyq nysandardy qura otyryp, turǵyndar densaýlyǵyn nyǵaıtýǵa, olardyń uzaq ómir súrýge qulshynysyn arttyrýǵa qosqan bul úlesi - ózgelerge úlgi, ónege. Oblys basshylyǵy atynan jaýapkershiligi zor ıgilikti eńbekterińizge alǵys aıtamyn», - dedi oblys ákimi Berdibek Saparbaev saltanatty jıynda.
Densaýlyq saıabaǵy qatar kelgen mereke - medıtsına qyzmetkerleri kúni qarsańynda ashyldy. Osy oraıda, jıynǵa qatysqan qonaqtar aq halatty abzal jandardy kásibı merekesimen quttyqtap, olardyń qıyn da kúrdeli qyzmetine sáttilik, eńbegine jemis tiledi. Ótken jyly Aqtóbe oblysy ákiminiń qararymen qazaqtyń tuńǵysh áıel-dárigeri Aqqaǵaz Dosjanova atyndaǵy syılyq taǵaıyndalǵany málim. Osyǵan baılanysty, Berdibek Saparbaev 7 nomınatsııa boıynsha laýreattarǵa medaldar men 500 myń teńgeden syılyqtar tabystady. Eń qurmetti mamandyqtyń 5 ókiline páter kilti tapsyryldy. Sonymen qatar, 12 aýdandyq jáne 1 aýyldyq aýrýhana sý jańa jedel járdem kóligine ıe boldy.
«Qaı zamanda da densaýlyq arashashysy bolǵan azamattar joǵary qurmetke laıyq. Elimizde medıtsına qyzmetkerleriniń abyroıyn asqaqtatyp, olardy barynsha qoldaýǵa memleket tarapynan erekshe kóńil bólinip keledi. Elbasy joldaýynda salany jetildirýge úlken nazar aýdarylǵan», - degen densaýlyq saqtaý vıtse-mınıstri Alekseı Tsoı 45 medıtsına qyzmetkerine mınıstrliktiń Alǵys hatyn jáne tósbelgisin tapsyrdy.
Saıabaq sahnasynda oblys medıtsınasynyń sońǵy jyldardaǵy jetistikteri beınekórinis arqyly kórsetildi. Merekelik sharanyń sońynda jınalǵan jurtshylyq arnaıy shaqyrtylǵan «MýzArt» tobynyń kontsertin, jergilikti óner¬pazdardyń ánderi men bılerin tamashalady. Jan-jaqty deńgeıdegi sporttyq jarystar uıym¬dastyryldy.
Densaýlyq saıabaǵynyń aýmaǵynda 1500-den asa tal-terekter otyrǵyzylyp, jasyl jelek boı túzegen, fontandar ornatylǵan. Kóshetterdiń denin ótken jyly densaýlyq saqtaý qyzmetkerleri merekesi qarsańynda uıymdastyrylǵan halyqaralyq forým kezinde elge eńbegi sińgen otandyq medıtsına qyzmetkerleri, alys-jaqyn shetelderden kelgen qonaqtar óz qoldarymen ekken eken. Búginde olardyń barlyǵy jaıqalyp ósip tur. Vorkaýt alańdar, velosıped joldary, fýtbol alańdary, ústel tennısi jurtshylyqtyń ıgiligine paıdalanyla bastady. Qonaqtar saıabaqtyń ishin aralap, sportpen shuǵyldanyp jatqan jasóspirimdermen áńgimelesti. Turǵyndardyń qan qysymyn ólshep, basqa da medıtsınalyq kómek kórsetip jatqan mamandardyń jumysyn kórdi.
Aldaǵy ýaqytta memlekettik mekemeler - oblystyq basqarmalar, aýmaqtyq departamentter, sondaı-aq, iri uıymdar men kásiporyndar qalany kórkeıtip, jasyl qordy tolyqtyra túsetin jáne qalalyqtardyń demalys ornyna aınalatyn 34 skver men alleıany óz kúshterimen salmaq.
