Densaýlyq salasyndaǵy tyıym salynbaǵan aqparattyń barlyǵy qoljetimdi bolýy tıis - Marat Báshimov

NUR-SULTAN. QazAqparat - Densaýlyq salasyndaǵy zańmen tyıym salynbaǵan aqparattyń barlyǵy qoljetimdi bolýy tıis. Bul týraly Ulttyq qoǵamdyq senim keńesiniń múshesi, Eýropalyq quqyq jáne adam quqyqtary ınstıtýtynyń dırektory Marat Báshimov aıtty, dep habarlaıdy QazAqparat tilshisi.

«Aqparatqa qoljetimdilik týraly zań qabyldanǵan. Atalǵan zańnyń negizgi maqsaty zańmen tyıym salynbaǵan aqparattardyń barlyǵyna ruqsat berilýi tıis», - dedi ol «Densaýlyq saqtaý salasynyń ashyqtyǵy: Jańa trendter aqparatqa qoljetimdilikke qalaı yqpal etedi» degen taqyryptaǵy onlaın pikirtalas barysynda.

Osyǵan oraı Ulttyq keńes múshesi bul máselelerdiń barlyǵyn medıtsına qyzmetkerlerimen, olardyń basshylarymen jan-jaqty talqylaý qajet degen oıyn bildiredi.

«Óıtkeni, bul dárilik preparattarǵa, medıtsınanyń qoljetimdiligine, salamatty ómir saltyna jáne medıtsınada barynsha ózekti sanalatyn barlyq blokqa qatysty jaıttar. Belgili bir preparttarǵa qatysty qolymyzda nege aqparat joq? Aıtalyq, men táýekel tobyna kiremin. Qan qysymym joǵary bolǵandyqtan dári ishemin. Jazyp bergen dárisin ishkennen keıin ınfarkt alyp qala jazdadym. Al odan keıin atalǵan dáriniń áli probatsııa satysynda ekendigin bildim. Buǵan qalaı jol berilgen. Muny bilgende esten tandym. Sodan keıin buryn qabylap júrgen dárime qaıta kóshtim», - dedi Marat Báshimov.