Densaýlyq salasynda qyzmetkerler jalaqysy bir jylda 32 paıyzǵa ósti
NUR-SULTAN. QazAqparat – 2020 jyldyń tórtinshi toqsanynda densaýlyq saqtaý jáne áleýmettik qyzmet kórsetý salasyndaǵy kesimdi ortasha aılyq jalaqy 197,4 myń teńgeni quraǵan. Bul 2019 jyldyń osyndaı kezeńimen salystyrǵanda 32,1 paıyz kóp bolyp, 2015 jyldan beri eń joǵary jyldyq ósim bolyp tabylady. Satyp alý qabiletiniń ınflıatsııany qosa alǵanda naqty ósimi 23,1 paıyzdy quraǵan, dep habarlaıdy ranking.kz saıty.
Salystyrmaly túrde: jalpy alǵanda Qazaqstan Respýblıkasy boıynsha ortashaaılyq jalaqy 14,3 paıyzǵa, 233,1 myń teńgege deıin ósken (naqty ósim — 6,5 paıyz). Densaýlyq saqtaý jáne áleýmettik kómek kórsetý salasyndaǵy jalaqy ortasha eseppen alǵanda respýblıka boıynsha jalaqydan 15 paıyz az.
QR Densaýlyq saqtaý mınıstrligi men Qazaqstandyq densaýlyq saqtaý qyzmetkerleriniń salalyq kásibı odaǵynyń arasynda ótken jyldyń basynda qol qoıylǵan kelisimge sáıkes, 2020 jyldyń 1 qańtarynan bastap dárigerlerdiń jalaqysyn ortasha eseppen alǵanda 30 paıyzǵa jáne ortasha medıtsınalyq qyzmetkerler jalaqysyn – 20 paıyzǵa ósirý josparlanǵan.
QR Eńbek jáne halyqty áleýmettik qorǵaý mınıstrliginiń resmı portalyndaǵy málimetterge sáıkes, 2021-2023 jyldary áleýmettik sala qyzmetkerleriniń jalaqysyn eki ese: 2021 jyldyń 1 qańtarynan – 50 paıyzǵa, 2022 jyly – 25 paıyzǵa jáne 2023 jyly taǵy 25 paıyzǵa ósirý josparlanǵan.
