Densaýlyq salasyna salynǵan qarjy kólemi ósti

NUR-SULTAN. QazAqparat – Bir jyldyń ishinde densaýlyq saqtaýǵa salynǵan qarjy 13 paıyzǵa ósti. Degenmen, bul Qazaqstandaǵy negizgi kapıtalǵa salynǵan jalpy ınvestıtsııa kóleminiń 1 paıyzyna da jetpeıdi, dep habarlaıdy QazAqparat energyprom-ǵa silteme jasap.

2019 jyldyń 7 aıynyń qorytyndysynda densaýlyq saqtaý men áleýmettik qyzmetterge salynǵan ınvestıtsııa kólemi 12,7 paıyzǵa artyp, 57 mlrd teńgeni (naqty kólem ındeksi 110,7 paıyz) qurady. Ótken jyldyń dál osyndaı kezeńindegi ınvestıtsııa somasy 50,6 mlrd teńgeni qurap, ósim 54,8 paıyz (naqty ındeks kólesi 147 paıyz) bolǵan edi. Atalǵan kezeńdegi ınvestıtsııa kóleminiń ósimi osymen úshinshi jyl qatarynan oryn alýda. Buǵan qosa, densaýlyq saqtaýǵa salynǵan negizgi qarjy salymynyń ınvestıtsııanyń jalpy somasyndaǵy úlesi 0,9 paıyzǵa teń.

Densaýlyq saqtaý men áleýmettik qyzmet salasyndaǵy ınvestıtsııanyń negizgi kózi respýblıkalyq bıýdjet bolyp otyr. Bıylǵy jyldyń qańtar-shildesinde bıýdjetten atalǵan sektorǵa 21,8 mlrd teńge (1 jyl buryn 10,9 mlrd teńge) bólindi.

Degenmen, jergilikti bıýdjetten qarajat salymy aıtarlyqtaı qysqara túsken. Qańtar-shildede ne bári 11,9 mlrd teńge bólindi. Bul ótken jyldyń dál osyndaı kezeńimen salystyrǵanda 30,9 paıyzǵa (17,2 mlrd teńge) kem.

Bıznestiń óz qarajaty 20,9 mlrd teńge bolyp, jyldyq ósimi 1,6 paıyzdy qurady. Bank nesıeleri men zaem qarajattyń kólemi tıisinshe 1,4 mlrd jáne 1 mlrd teńge boldy.

Esterińizge sala ketsek, bıylǵy jyldyń jeltoqsan aıynda 2020-2025 jyldarǵa arnalǵan densaýlyq saqtaý salasyn damytýdyń memlekettik baǵdarlamasy bekitiledi. Respýblıkalyq densaýlyq saqtaýdy damytý ortalyǵynyń bas dırektory Aınur Aıyphanovanyń aıtýyna qaraǵanda, úsh negizgi mindet aıqyndalǵan. Onyń atap ótýinshe, sóz tek qana memlekettik baǵdarlama tóńireginde bolyp otyrǵan joq. Jańa modelmen densaýlyq saqtaý salasyn qarjylandyrý qalyptastyryldy. ıAǵnı, taıaý 6 jylǵa arnalǵan densaýlyq saqtaýdyń qarjylyq modeli quryldy.

«Shyǵystar Jalpy ishki ónimniń 5 paıyzǵa deıin ulǵaıtylatyn bolady. Shyǵystardyń negizgi úlesi medıtsınalyq qyzmetterge jumsalady. Sonymen qatar memleketten aldaǵy birneshe jylda densaýlyq saqtaý shyǵystaryn eke ese ulǵaıtýdy ótindik», - dedi Aıgúl Aıyphanova.

Densaýlyq saqtaý men áleýmettik qyzmetterge ınvestıtsııanyń artýy 2018 jyldyń qańtar-shilde aılarymen salystyrǵanda respýblıkanyń ne bári 10 óńirinde ǵana baıqalady. Salymnyń aıtarlyqtaı ósimi Shyǵys Qazaqstan (3,1 ese), Jambyl (2,5 ese) jáne Nur-Sultan qalalarynda (2,4 ese) baıqalyp otyr.

Investıtsııanyń 13,2 mlrd teńgeni quraǵan eń úlken kólemi de Shyǵys Qazaqstan oblysyna tıesili. Al bir buryn bul óńirde ınvestıtsııa kólemi 4,2 mlrd teńgeni quraǵan edi. Munan bólek Almaty qalasy (8,6 mlrd teńge, bir jyl buryn 8,3 mlrd teńge bolǵan) men Almaty oblysy (6,7 mlrd teńge, bir jyl buryn 10,8 mlrd teńge bolǵan) ınvestıtsııa tartýda úzdik úshtikke kirip otyr.

Aıta keterligi, densaýlyq saqtaý men áleýmettik qyzmetterge salynǵan jalpy ınvestıtsııanyń 50 paıyzy osy TOP-3 óńirge tıesili.