Densaýlyq saqtaýdyń biryńǵaı ulttyq júıesindegi iri kemshilikterdi aldaǵy jaz aıyna deıin joıatyn bolamyz - vıtse-mınıstr
ASTANA. Aqpannyń 18-i. QazAqparat /Gúlmıra Álıakparova/ - Densaýlyq saqtaýdyń biryńǵaı ulttyq júıesindegi iri kemshilikterdi aldaǵy jaz aıyna deıin joıatyn bolamyz. Bul týraly búgin Astana qalasy Densaýlyq saqtaý basqarmasynyń alqa májilisinde QR Densaýlyq saqtaý vıtse-mınıstri Eljan Birtanov málim etti,
dep habarlaıdy QazAqparat.
Vıtse-mınıstrdiń sózine qaraǵanda, Densaýlyq saqtaýdyń biryńǵaı ulttyq júıesiniń (DBUJ) mehanızmderi tolyq pisip-jetilmegen jáne jańa júıeniń túsinbeýshiligi men medıtsınalyq uıymdardan joldanyp jatqan saýaldardyń azaıý úderisi baıqalyp otyrǵanymen, suraqtar áli de kelip túsýde. Sondyqtan qazir mınıstrlik ókilderi jańa júıeniń erejeleri men normalaryn jete túsindirý úshin aımaqtardy aralaýda.
«Problemaly jaıttardyń áli de kóp ekendigin bilemiz jáne biz olarmen kúndelikti jumys istep jatyrmyz. Jaz aılaryna deıin júıedegi iri kemshilikter joıylatyn bolady», dep ýáde etti ol.
E.Birtanovtyń aıtýynsha, negizgi problemalardyń biri - fakty boıynsha shyǵystardy esepteý júıesine, ıaǵnı baǵdarlamalyq qamtamasyz etýge qatysty. Al bul DBUJ-ny engizýdiń mańyzdy tetigi bolyp tabylady. Sonymen qatar, tarıfterdi qurý boıynsha da anyqtalmaǵan máseleler jeterlik. Sondaı-aq mınıstrlik ókili, qazir keıbir emhanalardyń basqa medmekemelerden aýysyp kelgen azamattarǵa úı jaǵdaıynda qyzmet kórsetýden bas tartýy buzýshylyq bolyp tabylatynyn jáne naýqasqa úıde qyzmet kórsetý - kepildendirilgen tegin medıtsınalyq kómektiń bir bóligi bolyp tabylatynyn qadap aıtty.
«Bul azamat úshin aqsha alǵyńyz kelse, oǵan medıtsınalyq qyzmetti úıde kórsetýge mindettisizder», - dedi ol.
E.Birtanov alqa májilisinde jalpy densaýlyq saqtaý júıesindegi túıtkilderdi de kóterdi. Máselen, onyń atap kórsetkenindeı, Qazaqstanda densaýlyq saqtaý salasyna bólingen qarajattardyń 80 paıyzǵa jýyǵy statsıonarlyq sektorǵa ketetin kórinedi. «Bul - biz tek aýrýdyń saldarymen ǵana kúresip jatyrmyz degen sóz. Konsýltatıvtik dıagnostıkany esepke almaǵanda, alǵashqy zvenoǵa densaýlyq saqtaý salasynyń jalpy shyǵystarynyń tek 5 paıyzy ǵana jumsalady», - deıdi ol.
