Densaýlyq saqtaýdyń biryńǵaı ulttyq júıesi halyqqa jasalynatyn zor kómek - Densaýlyq saqtaý mınıstri
ASTANA. Qańtardyń 13-i. QazAqparat /Marlan Jıembaı/ - Densaýlyq saqtaýdyń biryńǵaı ulttyq júıesi halyqqa jasalynyp jatqan úlken kómek, sonymen qatar tikeleı Memleket basshysynyń baqylaýynda turǵan baǵdarlama.
Bul baǵdarlama bizdi básekege qabiletti elderdiń qataryna qosylýǵa 1-2 saty jaqyndatady. Bul pikirdi búgin elordadaǵy Medıtsınalyq aqparattyq-taldaý ortalyǵynyń Saýyqtyrý bıýrosynda bolǵan densaýlyq saqtaý mınıstri Jaqsylyq Dosqalıev bildirdi.
«Elimizde osyndaı júıeni qurmaı básekege qabiletti elderdiń qataryna qosyla almaımyz. Bul júıeniń eń birinshi ustanymy - densaýlyq saqtaý mekemeleriniń básekege qabilettiligin kóterý. Osyǵan baılanysty medıtsına salasyndaǵy kepildendirilgen kómek básekege sáıkes qurylyp otyr. Munda tek qana medıtsınalyq mekemeler ǵana emes, sonymen qatar jekemenshik ujymdar da qatysady. Olardyń barlyǵy da básekege sáıkes jumys jasaýda», dedi Densaýlyq saqtaý mınıstri.
Onyń aıtýynsha, atalǵan júıeniń ekinshi ustanymy - ár azamattyń emhanany ózi tańdaý erkindigi. Osyǵan sáıkes kez-kelgen azamat óziniń emdelgisi kelgen emhanasyn tańdaı alady. Eger ol jerde durys kómek kórsetilmese nemese qyzmetine kóńili tolmasa basqa mekemeniń qyzmetine júginýine bolady. Sondyqtan memleket qarajaty da tańdaǵan mekemege aýdarylady. Kelesi ustanym boıynsha - kórsetilgen kómek naqty, anyq bolýy shart. Onyń emdeý, sondaı-aq dári-dármektiń qajettiligi sııaqty arnaıy standarttary bar. Al sońǵy ustanymǵa oraı kórsetilgen qyzmetke baılanysty qarajat tólenedi. Máselen, aýrý tolyq emdelse, onda qyzmet kórsetilgen mekemege 100 paıyz qarajat aýdarylady. Eger aýrý adam qaza bolsa, nemese emdelgennen keıin múgedek bolyp salsa, jalpy alǵanda osyndaı keleńsiz jaǵdaılarǵa dýshar bolsa, onda arnaıy saraptama júrgiziledi. Osydan keıin ǵana emhanaǵa qarajat tóleý nemese tólemeý máselesi sheshiledi. Sonymen qatar árbir emdelýshi aýrýhanadan shyǵar kezde kórsetilgen qyzmetke qanaǵattanǵandyǵyna nemese qanaǵattanbaǵandyǵyna baılanysty óz pikirin jazyp qaldyrady. Eger emdelýshi qanaǵattanbasa onda tólenetin qarjynyń kólemi saraptama arqyly sheshiledi.
«Qańtardyń 5-10 aralyǵynda barlyq mekemelerge jylda alatyn qarajattarynyń 30 paıyzy aýdaryldy. Bul buǵan deıin bolmaǵan. Endi osy mekemeler azamattarǵa durys medıtsınalyq kómek kórsetip, ár emdelýshiniń kóńilinen shyǵýy kerek», dedi J.Dosqalıev.
