Densaýlyq saqtaýdy saqtandyrý júıesin engizý qarastyrylady - S. Qaıyrbekova
ASTANA. 20 aqpan. QazAqparat - Densaýlyq saqtaýdy saqtandyrý júıesin engizý qarastyrylady.
Búgin QR Parlamenti Májilisinde ótken Úkimet saǵatynda Densaýlyq saqtaý mınıstri Salıdat Qaıyrbekova osylaı málim etti.
«Aǵymdaǵy jylǵy Memleket basshysynyń Joldaýynda júktelgen tapsyrmalardy oryndaý maqsatynda biz densaýlyq saqtaý júıesin damytýdy árbir azamattyń óz densaýlyǵyna yntymaqty jaýapkershiligin arttyrýdy eskere otyryp, densaýlyq saqtaýdy saqtandyrý júıesin engizýdi qarastyramyz. Bul júıe 2012 jyldyń 1 shildesinde usynylatyn bolady. Bul rette densaýlyq saqtaý boıynsha mınıstrden bastap, ákimniń, jumys berýshiniń, jeke azamattyń mindetteri bekitiletin bolady. Bundaı normalardy qabyldamaı turyp, bizge azamattardyń óziniń densaýlyǵyn saqtaýǵa basa mán berý mádenıetin qalyptastyrý múmkin emes tárizdi», - deıdi mınıstr.
Onyń aıtýynsha, zertteýlerge sáıkes, jurtshylyqtyń kópshiligi sportpen shuǵyldanbaıdy, 4 mln. qazaqstandyq shylym shekse, salmaqtyń shekten tys aýyrlyǵynan halyqtyń 35 paıyzy zardap shegedi.
«Aýyrǵannyń tıimsiz bolatynyn azamattar bilýi kerek. Medıtsınalyq áleýmettik qana emes ekonomıkalyq turǵydan alyp qaraǵanda da bul solaı. Máselen, naýqastyń kesheýildep dárigerge júginýi - patsıenttiń óz ómirine qaýip qana emes, oǵan ketetin shyǵyn da ulǵaıa túsedi. Sondyqtan da, biz Densaýlyq saqtaý júıesi jáne halyq densaýlyǵy kodeksine tıisti ózgerister engizýdi usynamyz», - deıdi mınıstr.
