Densaýlyq saqtaý júıesin damytý basty nazarda
ASTANA. QazAqparat - Premer-mınıstr Baqytjan Saǵyntaevtyń tóraǵalyǵymen ótken Úkimet otyrysynda densaýlyq saqtaý júıesiniń ınfraqurylymyn damytýdyń biryńǵaı perspektıvalyq jospary qaraldy.
Densaýlyq saqtaý mınıstri Eljan Birtanov 2016-2019 jyldarǵa arnalǵan «Densaýlyq» memlekettik baǵdarlamasy aıasynda Densaýlyq saqtaý ınfraqurylymyn damytýdyń biryńǵaı perspektıvalyq jospary ázirlenip jatqandyǵyna toqtaldy. Medıtsınalyq uıymdardyń jelisi densaýlyq saqtaý ınfraqurylymyn damytýdyń biryńǵaı perspektıvalyq jospary negizinde júıelenedi. Onda alǵashqy medıtsınalyq kómektiń qoljetimdiligin arttyrý, ınfraqurylymdy jańǵyrtý, medıtsınalyq uıymdardyń menedjmentin jaqsartý, ınvestıtsııalar tartý jáne jeke sektordyń úlesin ulǵaıtý, densaýlyq saqtaý júıesiniń sapasy men ekonomıkalyq tıimdiligin arttyrý kózdelgen.
Mınıstr elimizde bir jerde aýrýhanada naýqastarǵa oryn jetpeı jatsa, kelesi mekenjaıda, kerisinshe, emhanadaǵy bos oryndar tym kóp bolyp ketkendigin, bul densaýlyq saqtaý salasy ınfraqurylymyn durys josparlamaýdyń kórinisi ekendigin ashyp aıtty. Osy rette densaýlyq saqtaý ınfraqurylymyn damytýdyń biryńǵaı jospary asa qajet.
«Qazaqstanda 7914 densaýlyq saqtaý mekemesi bar. Sonyń ishinde 85,5%-i memlekettik emhanalar bolsa, 14,5%-i jeke menshikke tıesili. Medıtsınalyq uıymdardyń teń jartysy 30 jyl buryn salynǵan. Ótken jyly 11 myńǵa jýyq adam aýrýhanaǵa jatqyzýdy 90 kúnnen astam ýaqyt kútken. Alaıda, respýblıka boıynsha 4,2 myń jatyn oryn bos turdy. Osynyń ózi durys jospar qurmaýdyń dáleli», dedi E.Birtanov.
Qazirde jergilikti atqarýshy organdar medıtsına salasyn damytýǵa 1 trln. teńge surap otyr. Degenmen, qurylys nysandaryn josparlaý kezinde olardyń bıýdjet aqshasyn kóptep alýǵa da talpynatyndary joq emes.
Máselen, Astanada balalarǵa arnalǵan ınfektsııalyq emhanada bir jatyn orynǵa 240 sharshy metr qarastyrylǵan. Ondaı kórsetkish halyqaralyq talaptardan eki ese artyq, al respýblıka boıynsha salynatyn nysandar kórsetkishinen alty ese joǵary bolyp tur. Osylaısha, bir jatyn orynǵa bıýdjettiń biraz aqshasy ketip jatady.
«Ambýlatorlyq mekemeni salý kezinde naqty qajettilik, ıaǵnı jergilikti halyqtyń sany eskerilmeıdi. Sonyń saldarynan jatyn oryndar bos turady. Jergilikti organdar bıýdjet qarajatyn tıimdi jumsaýǵa jaýapsyz qaraıdy», dedi mınıstr.
Otyrysta Dúnıejúzilik banktiń Qazaqstandaǵy turaqty ókili A. Braýn, Azııa damý bankiniń Qazaqstandaǵy ókildiginiń dırektory Dj. Kapannellı, sondaı-aq Almaty oblysynyń ákimi A.Batalov atalǵan baǵyt boıynsha atqarylyp jatqan jumystar týraly baıandady.
Máseleni qarastyrýdyń qorytyndysy boıynsha, Premer-mınıstr Baqytjan Saǵyntaev Densaýlyq saqtaý mınıstrligine oblystardyń, Astana men Almaty qalalarynyń ákimderimen densaýlyq saqtaý nysandarynyń jelisin josparlaý jumystaryn qosymsha pysyqtap, mundaıda óńirlerdiń erekshelikterin, halyq sanyn, aýrý-syrqaýlar qurylymy men salany damytýdyń basymdyqtaryn eskerýdi tapsyrdy. Usynylatyn qyzmetterdiń sapasy men qoljetimdiligin arttyrý maqsatymen medıtsınalyq ınfraqurylymdy jańǵyrtý jumystaryn jalǵastyrý qajettigine nazar aýdardy.
Vedomstvoǵa ýákiletti memlekettik organdarmen birlesip jeke medıtsınany damytý boıynsha jumystardy jandandyrý, medıtsınalyq mekemelerdiń qurylys jumystaryna qatysty sanıtarlyq normalar men erejelerdi jeńildetý, densaýlyq saqtaý salasyn retteý sharalaryn qabyldaý, medıtsınalyq ınfraqurylymdy jańǵyrtý aıasynda densaýlyq saqtaý nysandarynyń qurylysyna arnalǵan tıptik jobalardy qurý máselelerin pysyqtaý tapsyryldy.
