Densaýlyq saqtaý jáne bilim berý júıeleriniń sapasyn arttyrý: Úkimettik jumys toby Pavlodar oblysyna baryp qaıtty
PAVLODAR OBLYSY. QazAqparat - 8 qarashada QR Premer-Mınıstriniń orynbasary Berdibek Saparbaev bastaǵan Úkimettik jumys toby Pavlodar oblysyna baryp qaıtty. Jumys tobynyń quramynda QR eńbek jáne halyqty áleýmettik qorǵaý mınıstri Birjan Nurymbetov, QR mádenıet jáne sport vıtse-mınıstri Eldos Ramazanov, QR aqparat jáne qoǵamdyq damý vıtse-mınıstri Marat Ázilhanov, QR bilim jáne ǵylym vıtse-mınıstri Sholpan Karınova, QR densaýlyq saqtaý mınıstri Kamaljan Nadyrov boldy, dep habarlaıdy QazAqparat Úkimet basshysynyń resmı saıtyna silteme jasap.
Úkimettik jumys toby Pavlodar oblysynyń jurtshylyǵymen kezdesý ótkizdi. Óz sózinde Premer-Mınıstrdiń orynbasary Prezıdenttiń Qazaqstan halqyna arnaǵan Joldaýynda alǵa qoıylǵan mindetterdi iske asyrý úshin Úkimet qandaı sharalardy qabyldap jatqanyn aıtyp berdi.
«Bıyl áleýmettik salaǵa 7,5 trln-nan astam teńge nemese respýblıkalyq bıýdjet shyǵystarynyń 45%-y baǵyttaldy. 2020 jylǵa arnalǵan bıýdjet jobasynda áleýmettik sala shyǵystarynyń úlesi 47%-ǵa deıin artady. Búgingi tańda memleket óziniń áleýmettik mindettemelerin tolyǵymen oryndaýda. Máselen, osy jyldyń 10 aıynda 200 mlrd teńgeden astam somada ataýly áleýmettik kómek tólendi. 2,2 mln adam qamtyldy, onyń ishinde – 1,5 mln bala. Qarjylandyrý kólemi 9 esege ósti», — dedi B. Saparbaev.
Sondaı-aq, Úkimettik jumys toby oblystyń pedagogtarymen jáne medıtsına qyzmetkerlerimen kezdesýler ótkizdi, Aqsý aýdany Evgenevka aýylynyń turǵyndarymen kezdesti jáne birqatar áleýmettik nysandardy aralady.
Óńirdegi medıtsına qyzmetkerlerimen ótken kezdesýde jalaqyny kóterý, mindetti medıtsınalyq saqtandyrýdy engizý, medıtsınalyq qyzmet sapasyn arttyrý, materıaldyq-tehnıkalyq bazany jaqsartý jáne taǵy basqa máseleler talqylandy.
Óńirde halyqtyń MÁMS engizý týraly aqparattanýynyń 52%-dan 85%-ǵa deıin joǵarylaǵany baıqalatyny atap ótildi.
Mindetti áleýmettik medıtsınalyq saqtandyrý engizilgennen keıin densaýlyq saqtaý júıesin qarjylandyrý edáýir artady. Úsh jyl ishinde densaýlyq saqtaý júıesine jumsalatyn shyǵyndar kem degende bir jarym esege — 1,3 trln teńgeden 2,5-3 trln teńgege deıin artýy kerek.
Sondaı-aq, dári-dármekpen qamtamasyz etýge jáne dári-dármekterdiń baǵasyn belgileýge nazar aýdaryldy. Búgingi tańda Qazaqstanda 7,8 myńǵa jýyq dári-dármek túrleri satylady jáne olardyń jartysynyń qunyn memleket retteıdi.
Buǵan qosa, vıtse-premer halyqty dári-dármekpen ýaqytyly qamtamasyz etýdiń mańyzdylyǵyna toqtaldy.
«Kelesi jyldyń basynda bizde dári-dármekpen qamtamasyz etýde eshqandaı kidirister bolmaýy úshin, qarasha-jeltoqsan aılarynda kelesi jylǵa arnalǵan barlyq kelisimsharttardy jasaýymyz kerek», — dedi ol.
Oblys ortalyǵynda jumys tobynyń músheleri óńirlik jedel járdem stantsııasynyń jumysymen tanysty. Pavlodarlyq 103 qyzmetiniń avtoparkinde 100-den astam arnaıy kólik bar. Barlyq mashınalar GPS sezbegimen jabdyqtalǵan, jedel járdem brıgadalarynyń medıtsınalyq qamtylýy «S» sanatynyń joǵary standarttaryna sáıkes keledi. Bul, B. Saparbaevtyń aıtýynsha, memlekettiń densaýlyq saqtaýdyń materıaldyq-tehnıkalyq bazasyn nyǵaıtý boıynsha qabyldap jatqan sharalarynyń aıqyn dáleli.
Bilim berý júıesin damytý jáne pedagogtyń mártebesin arttyrý turǵysynan, keler jyldan bastap pedagogterdiń jalaqysynyń ortasha kólemin shamamen 30%-ǵa arttyrý josparlanǵany atap ótildi. Bul maqsatqa shamamen 200 mlrd teńge bólindi.
Daryndy jáne talantty balalarǵa jan-jaqty qoldaý kórsetiledi. Tuńǵysh Prezıdent – Elbasynyń qorymen birge jaqynda Aqtóbede bastaý alǵan «El úmiti» jobasy iske asyrylyp jatyr. Onyń maqsaty — 1000-nan astam daryndy balalardy iriktep alý, olardyń bilim alýyna jáne talantyn damytýǵa qoldaý kórsetý. Erekshe qajettilikteri bar balalardyń ata-analaryna da jaqyn arada eleýli qoldaý kórsetiledi. Kelesi jyldan bastap, QR Tuńǵysh Prezıdenti – Elbasynyń bastamasy aıasynda elimizdiń óńirlerinde ońaltý ortalyqtary salyna bastaıdy.
«Memleket óz azamattarynyń ál-aýqatyn jaqsartý turǵysynan aýqymdy jumystar atqaryp jatyr. Kelesi jyldan bastap biz kóp balaly jáne az qamtylǵan otbasylardy qoldaý baǵdarlamalaryna ózgerister engizemiz. Eger buǵan deıin áleýmettik kómek alýshylar ózderiniń naqty kiristerin jasyra alsa, onda 2020 jyldan bastap bundaı faktiler múldem bolmaıdy. Sonymen qatar, Úkimet muǵalimniń mártebesin arttyrdy jáne muǵalimderdiń jalaqysyn 2 esege ósirýdi josparlap otyr», — dedi vıtse-premer.
QR Premer-Mınıstriniń orynbasary bastaǵan úkimettik jumys toby Aqsý qalasy men onyń aýyldyq aımaǵynda boldy.
Vıtse-premer osy jyly memlekettik-jekemenshik áriptestik aıasynda qurylǵan múgedek balalarǵa arnalǵan «Ortoprot» ońaltý ortalyǵynda boldy. Ortalyqta bir jarym jastan 18 jasqa deıin tirek-qımyl apparaty buzylǵan balalarǵa qyzmet kórsetiledi. Ashylǵannan beri tirek-qımyl apparaty buzylǵan 15 balaǵa kómek kórsetildi. Sondaı-aq, Evgenevka aýylyndaǵy dárigerlik ambýlatorııaǵa da bardy.
Úkimet top jumys saparyn Evgenevka aýylynyń turǵyndarymen kezdesýmen aıaqtady. Berdibek Saparbaev Prezıdenttiń «Cyndarly qoǵamdyq dıalog – Qazaqstannyń turaqtylyǵy men órkendeýiniń negizi» Joldaýynda júktelgen mindetterdiń oryndalýy týraly aıtty. Ol memleket muqtaj azamattardy áleýmettik qoldaý jumystaryn kúsheıtetinin atap ótti.
