Densaýlyq saqtaý jáne áleýmettik damý mınıstrligi qazaqstandyqtardyń shetelderde emdelýge qajettiligin joımaq
ASTANA. QazAqparat - Qazaqstan Respýblıkasynyń Densaýlyq saqtaý jáne áleýmettik damý mınıstrligi qazaqstandyqtardyń shetelderge baryp emdelýge degen qajettilikterin joıýǵa nıetti.
«Mınıstrlikte joǵary mamandandyrylǵan medıtsınalyq kómek pen biregeı tehnologııalardy damytý boıynsha aýqymdy sharalar qolǵa alynýda, bul bolashaqta qazaqstandyq azamattardyń shetelderge baryp em qabyldaýǵa degen qajettilikterin joıady», delingen atalmysh vedomstvonyń «QAzAqparat» HAA resmı saýalyna bergen jaýabynda.
Mınıstrlikte sondaı-aq keıingi jyldary otandyq klınıkalarda adam aǵzasynyń músheleriniń transplantatsııasy, julyn transplantatsııasy tárizdi otalardyń sátti júzege asyrylyp jatqany atap aıtyldy. Qazirgi kezde otandyq onkologııalyq qyzmet QR halqyna onkologııalyq kómek kórsetýdi damytýdyń 2012-2016 jyldarǵa arnalǵan baǵdarlamasynda qarastyrylǵan tórt baǵytty ustanady. Onyń birinshisi alǵashqy medıtsınalyq-sanıtarlyq kómek júıesin jetildirý bolsa, ekinshiden, onkologııalyq aýrýlardy dıagnostıkalaý men emdeýdiń joǵary tehnologııalyq ádisterin damytý bolyp tabylady. Al úshinshiden, onkologııalyq salada kadrlyq áleýetti nyǵaıtý, tórtinshisi - onkologııalyq qyzmet ınfraqurylymyn jetildirý, onyń materıaldyq-tehnıkalyq bazasyn nyǵaıtý.
