Densaýlyq saqtaý zańnamasyna engiziletin ózgerister ulttyq ekonomıkamyzǵa qaıshy - A.Perýashev
ASTANA. 3 aqpan. QazAqparat /Arman Asqarov/ - Temeki ónimderi boıynsha elimizdiń densaýlyq saqtaý zańnamasyna engiziletin ózgerister ulttyq ekonomıkamyzǵa qaıshy keledi.
Búgin «Nur Otan» partııasynyń Ortalyq apparatynda «Qazaqstandaǵy zańsyz taýar aınalymy: sebep-saldary men qorǵaý is-sharalary» taqyrybyn qozǵaǵan dóńgelek ústelde «Atameken odaǵy» ulttyq ekonomıkalyq palatasynyń basqarma tóraǵasy Azat Perýashev osylaı aıtty.
Onyń habarlaýynsha, QR Parlamenti Májilisiniń Ekonomıkalyq reforma jáne aımaqtyq damý komıteti kúni keshe ǵana densaýlyqty saqtaý zańnamasy boıynsha temeki ónimderiniń adam densaýlyǵyna qaýipti ekendigin kórsetý úshin jazýmen birge sýret-pıktogrammany salý jónindegi ózgeristerdi maquldady. Onsyz temeki ónimderin satýǵa tyıym salynǵan. Osy ózgerister zańdy túrde kúshine enetin bolsa, 2 adam jumys isteıtin kásiporyndar men 3 myń adamy bar temeki shıkizaty sharýashylyqtarynyń jumysy toqtaıdy. Osynyń nátıjesinde tek Almaty oblysy ǵana bir jyldyń ishinde 19 mlrd. teńgeniń salyǵynan aıyrylady. Kompanııaǵa 12 mlrd. teńge shyǵyn kelip, jumyssyz qalatyn 5 myń adamǵa jyl saıyn 1,5 mlrd. teńge kóleminde áleýmettik járdemaqy tóleýge týra keledi.
«Árıne, osynyń barlyǵy - temeki shegý sııaqty zııandy qoǵamdyq dertterge qarsy qolǵa alynyp jatqan sharalar. Biraq, bir jaǵynan buny temeki shyǵarýshylardyń múddesin qorǵaý dep ataýǵa bolady. Osy ózgeristerdi qabyldaǵan depýtattar ulttyq ekonomıkany oılamaı, sheteldik taýar óndirýshilerdiń múddesin qorǵap otyr. Sebebi Kedendik odaq aıasynda temeki ónimderine qosymsha pıktogramma salý mindeti tek bizdiń taýar óndirýshilerimizge ǵana júktelgen. Al Belarýs pen Reseıdiń kásiporyndary ondaı mindetke baǵynbaıdy», - deıdi A.Perýashev. Ol atap kórsetkendeı, osyǵan baılanysty ázirlengen resmı hat QR Prezıdent» Ákimshiligine jáne basqa da tıisti organdarǵa jiberildi.
