Densaýlyq saqtaý vıtse-mınıstri Shymkenttegi aýrýhanalardy aralady

ShYMKENT. QazAqparat – QR Densaýlyq saqtaý vıtse-mınıstri Kamaljan Nadyrov Shymkenttegi medıtsınalyq saqtandyrý júıesine daıyndyq jumystarymen tanysty, dep habarlaıdy QazAqparat tilshisi.

Kamaljan Nadyrov QR Prezıdenti Qasym-Jomart Toqaevtyń «Syndarly qoǵamdyq dıalog - Qazaqstannyń turaqtylyǵy men órkendeýiniń negizi» Joldaýyndaǵy tapsyrmasyna sáıkes atqarylyp jatqan jumystar barysyn saralap kórdi. Onkologııalyq ortalyqtaǵy emhananyń elektrondy qyzmetterimen jáne tsıfrlandyrý júıesi boıynsha jumys isteý qarqynymen tanysty.

Munan soń qalalyq perınataldyq ortalyqqa at basyn buryp, sıtýatsııalyq ortalyqtyń jumysyn kórdi. Atalǵan ortalyqtaǵy biryńǵaı júıe arqyly perzenthanadaǵy mamandar júktilikpen esepte turatyn áıelderdiń densaýlyq jaǵdaıyn baqylap otyrady. Bul júıe arqyly mamandar ana men bala ólimin azaıtyp, shuǵyl kómekti qajet etetin aıaǵy aýyr áıelderge der kezinde medıtsınalyq kómek kórsetpek.

Vıtse-mınıstr sondaı-aq, perzenthanadaǵy trenıng ortalyqqa bardy. Bul ortalyqta akýsher, gınekolog, neonatolog, reanımatolog syndy mamandar alǵashqy medıtsınalyq qyzmet kórsetý boıynsha biliktiligin arttyrady. Trenıng ortalyǵynyń jumysyn vıtse-mınıstr joǵary baǵalap, dáris beretin mamandarǵa sáttilik tiledi.

Sonymen qatar, Qamaljan Nadyrov jumys sapary barysynda №3 qalalyq emhanany aralady. Bul emhanada mamandar 100 paıyz tsıfrlandyrý júıesi boıynsha halyqqa medıtsınalyq qyzmet kórsetedi.