Densaýlyq saqtaý vıtse-mınıstri Shelek aýrýhanasyna qatysty túsinik berdi
ASTANA. QazAqparat - Shelek aýrýhanasynda aıtarlyqtaı tájirıbeli dárigerler jumys istep jatyr. Bul týraly qoıylǵan saýaldarǵa Feısbýk arqyly jaýap berý kezinde Densaýlyq saqtaý vıtse-mınıstri Lázzat Aqtaeva málim etti, dep habarlaıdy QazAqparat.
Onlaın saýaldar barysynda jeli paıdalanýshysy Almaty oblysyndaǵy Shelek aýrýhanasyna qatysty komıssııa qurý týraly ótinimin jasady. Osy oraıda atalǵan aýrýhana jumysynda birqatar kemshilikter bar ekeni aıtyldy.
Óz kezeginde Lázzat Aqtaeva qoıylyp otyrǵan suraqtar ózekti ekenin aıta kele: «ózderińiz bilesizder, osy aýrýhanada káriz júıesindegi aqaýǵa baılanysty 2 tehnıkalyq jumysshy men bir dáriger kóz jumdy. Atalǵan aýrýhananyń bas dárigeri atqarǵan qyzmetinen bosatyldy. Osy nysanda kúrdeli jóndeý júrgizý úshin jergilikti bıýdjetten 100 mln teńge bólinedi. Jalpy, ózge de qurylys jumystaryna respýblıkalyq bıýdjetten aldaǵy jyldary qarjy bólý qarastyrylýda», - dedi.
Sonymen qatar vıtse-mınıstr Shelek aýrýhanasyna baryp, ondaǵy jaǵdaımen tanysqanyn eske salyp ótti.
«Jalpy, Shelek aýrýhasynda aıtarlyqtaı tájirıbeli dárigerler jumys istep jatyr. Sonymen birge biliktilikpen qatar, materıaldyq-tehnıkalyq baza da mańyzdy. Bul óz kezeginde medıtsınalyq qyzmetter sapasynyń quramdas bóligi», - dedi L. Aqtaeva.
Esterińizge sala keteıik, Shelek aýrýhanasynyń aýlasynda 5 adam káriz qudyǵyna túsip, onyń úsheýi ýly gaz saldarynan qaıtys bolǵanyn habarlaǵan bolatynbyz.
Káriz júıesin tazalap jatqan santehnık nájiske batyp, oǵan tórt adam kómekke umtylǵan edi. Ókinishke qaraı, 3 adam nájistiń ıisine ýlanyp, kóz jumdy.
Budan buryn habarlanǵandaı, QR Densaýlyq saqtaý mınıstri Eljan Birtanov tozyǵy jetken Shelek aýrýhanasy jóndeletinin aıtqan bolatyn.
Aıta keteıik, buǵan deıin biz Almaty oblysy Eńbekshiqazaq aýdany Shelek aýyly ortalyq aýrýhanasynyń múshkil jaǵdaıy týraly habarlaǵan bolatynbyz.
