Densaýlyq saqtaý vıtse-mınıstri elordadaǵy balalar úıine bardy
NUR-SULTAN. QazAqparat - Densaýlyq saqtaý vıtse-mınıstri Ajar Ǵınııat Nur-Sultan qalasy ákimdiginiń «Mamandandyrylǵan balalar úıi» KMM-ne jumys saparymen baryp, ondaǵy balalardyń ómir súrý jaǵdaıymen tanysty, dep habarlaıdy QazAqparat.
Vıtse-mınıstr ata-anasynyń qamqorlyǵynsyz qalǵan tárbıelenýshilerdiń, sondaı-aq erte jastan balalardy ońaltý jáne abılıtatsııalaý boıynsha jumystardyń uıymdastyrylý deńgeıin, búldirshinderge qolaıly orta qalyptastyrý baǵytyndaǵy is-sharalardy baǵamdady. 
A.Ǵınııat otbasy úlgisinde ashylǵan «Bóbek» tobynda bolyp, ómirlik qıyn jaǵdaıǵa tap bolǵan balalarǵa arnalǵan «Kúnim» jáne «Botaqan» ońaltý toptarynda boldy.
Sonymen qatar, ol medıtsınalyq, psıhologııalyq-pedagogıkalyq jáne áleýmettik jumystarmen aınalysatyn mamandarmen tanysyp, EDSh úlken jáne kishi zaldaryna, basseınge, fızıoprotsedýra, montessorı jáne ádistemelik kabınetterine, sensorlyq bólme men logopedter, áleýmettik qyzmetkerler kabınetterinde boldy.
Balalar úıiniń bazasynda onlaın rejımde jumys keńesi ótti. Oǵan QR Densaýlyq saqtaý mınıstrligi Ana men bala densaýlyǵyn qorǵaý departamentiniń dırektory Maǵrıpa Embergenova, Nur-Sultan qalasy Qoǵamdyq densaýlyq saqtaý basqarmasynyń basshysy Tımýr Muratov, Nur-Sultan qalasy Qoǵamdyq densaýlyq saqtaý basqarmasy basshysynyń orynbasary Gúlnar Dosmyrzaeva, sondaı-aq Densaýlyq saqtaý basqarmalarynyń birinshi basshylary men óńirlerdegi balalar úıleriniń dırektorlary qatysty. Kún tártibinde tárbıelenýshilerdiń balalar úıinde bolý jasyn 6 jasqa deıin uzartý, kadrlyq qamtamasyz etý, mamandardyń biliktiligin arttyrý jáne basqa da máseleler talqylandy.
Jalpy, sapar qorytyndysy boıynsha A.Ǵınııat elordalyq balalar úıiniń qyzmetine joǵary baǵa berdi.
