Densaýlyq saqtaý vıtse-mınıstri Astanadaǵy mekteptiń birinde densaýlyq sabaǵyn ótkizdi
ASTANA. 3 qyrkúıek. QazAqparat - Búgin Qazaqstan Respýblıkasynyń Densaýlyq saqtaý vıtse-mınıstri Erik Baıjúnisov Astanadaǵy №50 mektebiniń oqýshylarymen densaýlyq sabaǵyn ótkizdi.
«Salaýatty ómir salty men densaýlyq saqtaýdyń mańyzdylyǵy turǵysynda sabaq ótkizý men úshin úlken qurmet. Bizdiń mınıstrlik osy bastamamen Bilim jáne ǵylym mınıstrligine ótinish jasady. Osy kezdesýdi qyzyqty ári tartymdy ótkizý úshin sizderge tıisti keńester berip, ıaǵnı dáriger retinde densaýlyqtyń mán-mańyzy tóńireginde sóz qozǵaıtyn bolamyz jáne sizderdiń saýaldaryńyzǵa jaýap berýge tyrysamyz», - dedi vıtse-mınıstr.
Aıta keteıik, E. Baıjúnisov osy júzdesý barysynda oqýshylarǵa densaýlyq saqtaý salasyndaǵy sapaly qyzmet kórsetý baǵytyndaǵy jumystar jaıynda málimetterdi jetkizdi.
Sonymen qatar, vıtse-mınıstr jasóspirimderge jaman ádetterdiń, ıaǵnı temeki men alkogoldiń zııany jaıynda keńinen maǵlumattar berdi. «Jańadan qalyptasyp kele jatqan ómirlerińizdi buzbaı, kerisinshe ǵylymı joǵary bıikterden kórinip nemese bizdiń Olımpıadashylar sekildi jetistikterge jetýge tyrysý qajet», - dep túıindedi ol .
