Densaýlyq saqtaý salasyndaǵy reforma aýyl aýrýhanasyn kúıretpese ıgi - S. Áıimbetov
ASTANA. Naýryzdyń 3-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda QR Premer-Mınıstriniń atyna saýal joldaǵan depýtat Seıitsultan Áıimbetov densaýlyq saqtaý salasyndaǵy jańa reforma tóńireginde týyndaǵan problemalardy kóterdi.
Onyń ishinde depýtat aýyldyq aýrýhanalarǵa qatysty alańdaýshylyǵyn bildirdi, dep habarlaıdy QazAqparat.
«2010 jyldan bastap densaýlyq saqtaý salasynda engizilip jatqan jańa reforma syrqattardy emdeý turǵysynan oń septigin tıgizgenimen, aýyldyq jerlerdegi qalyptasqan densaýlyq saqtaý júıesin kúızeltip, onyń ydyraýyna ákep soǵýy ábden múmkin. Reformaǵa daıarlyq barysynda aýyldyq jerlerdegi aýrýhanalar memlekettik mekeme mártebesin joǵaltyp, aýdandyq aýrýhanalarmen biriktirilip, qazynalyq kásiporyn retinde qaıta qurylǵan bolatyn. Osyndaı rásimdeýden aýyldyq dárigerlik emhanalar men aýdandyq emhanalar da ótti. Qazirgi reformaǵa sáıkes, syrqat qaı aýrýhanada em qabyldasa, qarajat sol aýrýhanaǵa aýdarylady. Bul óz kezeginde, materıaldyq -tehnıkalyq jabdyqtarmen jáne bilikti mamandarmen tolyq qamtamasyz etilmegen aýyldyq aýrýhanalardyń tirshilik etý múmkindigin shektep, olardyń jabylýyna jol ashady», dedi depýtat. Onyń aıtýynsha, reformaǵa sáıkes, aýyldyq aýrýhanalarǵa eshqandaı qarajat túspeı otyr. Al bul shalǵaıdaǵy aýrýhananyń aǵymdaǵy shyǵyndarynyń tólenbeýine, kredıtorlyq qaryzynyń qalyptasýyna soqtyrady. Aqyr sońynda bundaı eldi mekenderdegi aýrýhanalar jabylyp tynýy múmkin. «Aýrýhana jabylǵan jaǵdaıda ondaǵy qyzmet etken dárigerler men orta býyn medıtsına qyzmetkerleriniń taǵdyry eshkimdi alańdatpaı otyr. Olardyń qaıda baratyny da belgisiz. Al bul óz kezeginde jumyssyzdyq sanyn kóbeıtip, aýyldyq jerdegi áleýmettik ahýaldyń tómendeýine jol berýi múmkin. Sonymen qatar, aýrýhana ǵımaraty ıesiz qalyp, aýyl kelbeti buzylmaıtynyna kim kepil?», dedi S. Áıimbetov. Osyǵan baılanysty, depýtat reforma ózin-ózi aqtaǵansha aýyldyq aýrýhanalardyń aǵymdaǵy shyǵyndaryna (otyn, sý, jylý, eńbek aqy jáne t.b.) aı saıyn qarajat aýdarý tártibin belgileýdi alǵa tarty. Onyń aıtýynsha, bundaı shyǵyndar bıýdjetten ótelýi shart.
