Densaýlyq saqtaý salasynda jeke ınvestorlar kóbeıdi - Eljan Birtanov
«Mindetti áleýmettik medıtsınalyq saqtandyrýdy engizýge qajetti daıyndyq júrgizildi. Mindetti áleýmettik medıtsınalyq saqtandyrý týraly zań qabyldandy. Oǵan qyzý talqylaýlardan keıin túzetýler engizilip, merzimi eki ret aýystyryldy. Munyń barlyǵy elimizdiń reformaǵa tyńǵylyqty daıyndalǵanyn kórsetedi. Áleýmettik medıtsınalyq saqtandyrý qory qurylyp, medıtsınalyq qyzmetter tólemi komıtetiniń quqyqtyq mırasqory atandy. Medıtsınalyq qyzmetter tólemi komıtetiniń memlekettik organ ekenin, qazynashylyq júıesimen jumys isteıtin bıýdjet qarajatyn retteýshi ekenin túsinemiz. Al Áleýmettik medıtsınalyq saqtandyrý qory - korporatıvti basqarý prıntsıpimen jumys isteıtin jańa ınstıtýttsıonaldyq qurylym, bıýdjetten tys qor, kommertsııalyq emes uıym», - dedi Eljan Birtanov «MÁMS: qazaqstandyq medıtsınanyń jańǵyrýy» forýmynda.
Onyń aıtýynsha, qazir tegin medıtsınalyq kómektiń kepildik berilgen kólemindegi qyzmet kórsetýshilerdiń 52% jeke medıtsınalyq uıymdar bolyp otyr. Bul - «Densaýlyq» baǵdarlamasy aıasynda júrgizilgen júıeli jumystardyń nátıjesi, barlyq medıtsınalyq uıymdarda korporatıvtik basqarý engizilgen.
«Qazirgi ýaqytta memlekettik kásiporyndardyń 100% qyzmetkerleri jalaqysyna jáne olardyń qyzmet qurylymyna baılanysty qarajatty bólýde ekonomıkalyq erkindik aldy. Endi qatań memlekettik baqylaý bolmaıdy. Bul kásiporyndardyń 88% baqylaý keńesterin qurady. Basqarý sapasyn jaqsartý úshin barlyq memlekettik medıtsınalyq uıymdarda tek medıtsına ǵana emes, qoǵam, bıznes, ekonomıka jáne zańgerlerdiń qatysýymen baqylaý keńesteri qurylýy kerek. Jasyryn emes, búginde memlekettik kásiporyndar memlekettik tapsyrystyń 80% alady - bul 800 mıllıard teńge. Іs júzinde árbir bas dáriger ortasha eseppen 1,5-2 mıllıard teńge bıýdjetpen jumys isteıdi. Munda ashyqtyq pen tıimdilik óte mańyzdy», - dedi mınıstr.
2016 jylmen salystyrǵanda bıylǵy jyl sońynda densaýlyq saqtaý salasyna salynǵan ınvestıtsııalar kólemi úsh esege artty. Sonymen birge jeke ınvestıtsııalardyń úlesi eki esege ósti.
«Búginde densaýlyq saqtaý salasyndaǵy jeke ınvestıtsııalardyń úlesi 40% nemese 60 mlrd teńgeni quraıdy. Bul jeke sektordyń uzaq merzimdi ınvestıtsııalar men densaýlyq saqtaý salasyn damytýǵa qyzyǵýshylyǵy bar ekendigin kórsetedi. Bul tıimdi basqarýdy tartý arqyly memlekettik qarajatty únemdeýge bolady degendi bildiredi»,- dep óz sózin túıindedi mınıstr Birtanov.