Densaýlyq saqtaý salasynda 65 myń 844 múmkindigi shekteýli balalar esepte tur

Búgin Parlament Májilisiniń Áleýmettik-mádenı damý komıtetiniń keńeıtilgen otyrysy barysynda Densaýlyq saqtaý vıtse-mınıstri Erik Baıjúnisov osylaı málim etti. Eske salsaq, komıtet otyrysynda «Qıyn ómir jaǵdaıyndaǵy balalar men jastar úshin arnaýly áleýmettik qyzmetterdi usyný júıesin ózgertý úshin jaǵdaılar jasaý» máselesi talqylanǵan edi.

«Densaýlyq saqtaý salasyndaǵy málimetterge sáıkes, múmkindigi shekteýli balalar qurylymynda birinshi orynda jarymjandyqqa ushyratatyn týa bitken aqaýlar, ekinshi orynda júıke aýrýlary, al úshinshi kezekte psıhıkalyq buzylý aýrýlary tur. Biz osy basty úsh baǵytpen jumysty belsendi túrde arttyryp kelemiz», - deıdi E.Baıjúnisov.

Onyń aıtýynsha, atalǵan baǵyttaǵy basty másele kemtarlyqqa soqtyratyn aýrý túrlerin erte bastan anyqtaý bolyp otyr. Budan soń, medıtsınalyq kómekti, onyń ishinde joǵary bilikti járdemdi der kezinde kórsetý jumystarynyń mańyzy zor. Úshinshi tıimdi baǵyt osy sanatty sapaly dári-dármekpen tıimdi qamtamasyz etý. «Sonymen qatar, áleýmettik qyzmetter men ońaltý baǵdarlamalarynyń da mańyzy zor. Biz «Salamatty Qazaqstan» memlekettik baǵdarlamasy aıasynda osy baǵyttarǵa basa mán berip kelemiz», - deıdi E. Baıjúnisov.