Densaýlyq saqtaý salasyna bólinetin qosymsha 120 mlrd teńge qaıda jumsalady

ASTANA. QazAqparat -«Nur Otan» partııasynyń XVIII sezinde QR Prezıdenti Nursultan Nazarbaev densaýlyq salasyn damytýǵa qosymsha 120 mıllıard teńge bólýdi tapsyrǵan bolatyn. Úkimettiń búgingi otyrysynda QR Densaýlyq saqtaý mınıstri Eljan Birtanov ol qarajattyń qalaı jumsalatynyn aıtty, dep xabarlaıdy QazAqparat tilshisi.

«Memleket basshysynyń densaýlyq saqtaý salasyn damytýǵa qosymsha 120 mıllıard teńgeni bólý tapsyrmasy aıasynda elimizdiń 7 óńirinde 10 aýrýxana salynady. Bul aýrýxanalar tozǵan jáne eski aýrýxanalardyń ornyna salynatyn bolady. Osynyń arqasynda jylyna 100 myńǵa jýyq patsıent jańa statsıonarlyq texnologııalardy paıdalanyp, sapaly em-dom alady», - dedi E.Birtanov.

Mınıstrdiń aıtýynsha, memlekettik-jekeshelik áriptestik negizinde 56 eskirgen aýrýxananyń ornyna qosymsha 15 kópbeıindi aýrýxana salynatyn bolady. Osylaısha, 2025 jylǵa deıin biryńǵaı jospar boıynsha memlekettik-jekeshelik áriptestik aıasynda atalǵan aýrýxanalardyń qurylysyna qosymsha 800 mıllıard teńge baǵyttalady.

Aıta keteıik, búgingi otyrysta Eljan Amantaıuly 225 myńnan astam medıtsına qyzmetkerleriniń jalaqysy ósetinin málimdedi.

«Mysaly, meıirbıkeniń ortasha jalaqysy 76 myńnan 100 myńǵa deıin kóteriledi. Al kishi medıtsınalyq personaldyń aılyǵy 48 myńnan 64 myńǵa artady. Oǵan qosa, joǵary suranysqa ıe mamandyqtar boıynsha dárigerlerdiń jalaqysy da ulǵaıatyn bolady. Jalpy, 225 myńnan astam medıtsına qyzmetkerleriniń jalaqysy ósedi. Osyǵan oraı, 2019 jyly respýblıkalyq bıýdjetten 37,6 mıllıard teńge, al 2020 jyldan bastap 78,7 mıllıard teńge bólinedi», - deıdi E.Birtanov.

Budan bólek, respýblıka boıynsha 600-ge jýyq shaǵyn emxana salynady.