Densaýlyq saqtaý salasyna bólinetin qarjy qanshalyqty ashyq jumsalady – sarapshy pikiri

NUR-SULTAN. QazAqparat - Qazaqstandyq sarapshylar toby densaýlyq saqtaý salasyndaǵy qarajatty jumsaý sharalary qanshalyqty ashyq júzege asyrylýda degen másele tóńireginde áleýmettik zertteý júrgizgen. Bul týraly Densaýlyq saqtaý bıýdjeti ashyqtyǵyna júrgizilgen monıtorıngi jaıynda ótken «Antikor.Live baǵdarlamasynda aıtyldy, dep habarlaıdy QazAqparat tilshisi.

Ekonomıka jáne densaýlyq saqtaýdy qarjylandyrý máseleleri jónindegi sarapshy jáne konsýltant Marat Mamaev qazaqstandyq densaýlyq saqtaýdyń respýblıkalyq bıýdjettegi úlesi shamamen bir jarym trıllıon teńgeni quraıtynyn aıtty. Jaqynda sarapshylar toby bul qarajatty jumsaý sharalarynyń ashyqtyǵyna baılanysty áleýmettik zertteý júrgizgen.

«Jaqynda biz «ashyqtyq jáne esep berý» degen qyzyqty jobamen aınalystyq. Barlyq saıtty, ashyq derekkózderdi, málimetter bazasyna sholý jasap, monıtorıng júrgizdik. Biz bıýdjetti qalyptastyrý jáne ıgerý kezeńinde ashyqtyq pen esep berýshilik týraly túsinik joq ekenin, ıaǵnı árqashan biz qalaǵandaı bola bermeıtinin túsindik», - deıdi Marat Mamaev.

Ol zertteý jumysy qalaı júzege asqany týraly aıtty.

«Biz saıtqa kirip, aqsha qaıda, qalaı jumsalatynyn, josparlanǵan qarajattyń ıgerilýi qandaı kólemde júzege asyp jatqanyn qaradyq. Zertteý júrgizý barysynda biz bir qyzyqty nárseni kórdik: saıttarda «azamattyq bıýdjet» dep atalatyn prezentatsııa bar jáne ol jerde «tegin medıtsınalyq kómektiń kepildendirilgen kólemi aıasynda medıtsınalyq kómek kórsetý» dep atalatyn bir ǵana sóılem men bir ǵana san jazylyp turýy múmkin. Basqa eshteńe joq. ıAǵnı, prezentatsııa túrinde esep berýdiń ózi tıptik túrde júzege aspaıdy», - deıdi Marat Mamaev.