Densaýlyq saqtaý salasy jańa elektrondy júıege kóshedi - vıtse-mınıstr

NUR-SULTAN. QazAqparat – Densaýlyq saqtaý salasy «eHealth» jańa elektrondy júıesine kóshedi. Bul joba salany tsıfrlandyrý maqsatynda jasalyp otyr. QazAqparat tilshisiniń saýalyna jaýap bergen Densaýlyq saqtaý vıtse-mınıstri Beıbit Esenbaev osylaı dep málim etti.

Onyń aıtýynsha, Prezıdent synynan keıin salany tsıfrlyq transformatsııalaý boıynsha jumystar qaıta qaralyp, jańa platformaǵa kóshý jumysy pysyqtalyp jatyr.

«Densaýlyq saqtaý salasyn tsıfrlandyrý aıasynda eHealth elektrondy densaýlyq saqtaýdyń jańa sandyq formatyna kóshý jumystary bastaldy. EHealth elektrondy densaýlyq saqtaý júıesi azamattardyń densaýlyq pasportyn tolyqqandy jáne jan-jaqty qalyptastyrýǵa yqpal etedi. Bul azamattardyń suranysyna baǵyttalǵan medıtsınalyq kómektiń sapasy men qoljetimdiligin arttyrýǵa baǵyttalǵan. Sondaı-aq, eHealth patsıentterdiń densaýlyq jaǵdaıyn únemi baqylaý jáne medıtsınalyq qyzmetterdi jedel usynýdy júzege asyrýdy qamtamasyz etedi», - dep málim etti vıtse-mınıstr QazAqparat tilshisiniń saýalyna jaýap bere otyryp.

Beıbit Esenbaevtyń málimetinshe, eHealth platformasyna kóshý kezinde qaıtalama fýnktsııalardy atqaratyn aqparattyq júıeler alynyp tastalady.

«EHealth sandyq densaýlyq saqtaý júıesin iske qosý úshin 2022-2023 jyldarǵa arnalǵan jospar ázirleý kózdelýde. Oǵan sáıkes, densaýlyq saqtaý salasyndaǵy barlyq aqparattyq júıeler ózara yqpaldasa otyryp jumys isteıdi. Onyń ishinde medıtsınalyq mekemeler arasynda klınıkalyq derekter almasý júıesin retteý mańyzdy», - dedi Beıbit Esenbaev.

Eske sala keteıik, Memleket basshysy Qasym-Jomart Toqaev Úkimettiń keńeıtilgen otyrysynda Densaýlyq saqtaý mınıstrligi salany tsıfrlandyrýdan qashyp otyr, dep syn aıtqan edi.