Densaýlyq saqtaý nysandarynyń qurylysy qatań baqylaýǵa alynady - Úkimet basshysy
ASTANA. 17 sáýir. QazAqparat - Densaýlyq saqtaý nysandarynyń qurylysy qatań baqylaýǵa alynady. Bul týraly búgin selektorlyq rejimdegi Úkimet otyrysynda Premer-Mınıstr Kárim Másimov málim etti.
«Belgilengen ýaqyttan tys qurylys merzimi sozylǵan barlyq densaýlyq saqtaý nysandary men bul baǵyttaǵy basqa da problemalardy udaıy qadaǵalap otyrýdy tapsyramyn. Bul nysandardyń qurylysy tıisti merzimde tapsyrylýy tıis»,-dep júktedi K. Másimov ákimder men mınıstrge.
Osy baǵyttaǵy sharalardy Úkimet basshysynyń orynbasary Erbol Orynbaev baqylaıtyn bolady. Premer-Mınıstr bıylǵy qańtarda Úkimettiń keńeıtilgen otyrysynda Elbasy densaýlyq saqtaý nysandary qurylysy máselesine oraı qatań tapsyrmalar bergenin eske salyp ótti. Budan bólek, jaqynda Astanada ótken keńeste Prezıdent qurylys nysandary jobasynyń qymbattaýy máselesi turǵysynda tıisti qadaǵalaý sharalary boıynsha tapsyrmalar berdi.
«Atap aıtqanda, densaýlyq saqtaý nysandary jobasynyń qymbattaýyna jol berilmeýi shart»,-dep toqtaldy Úkimet basshysy. Sonymen qatar Premer-Mınıstr densaýlyq saqtaý nysandary qurylysynda memlekettik-jeke menshik áriptestik ustanymyn paıdalaný boıynsha Elbasynyń tarapynan qoldaý jasalǵanyn aıtty.
«Sondyqtan da, jaýapty mınıstrlik pen oblys ákimderi bul baǵyttaǵy sharalardy qarastyryp, osy úderisti alǵa jyljytý úshin jaqyn arada ilki jobalardy iske qosýy kerek»,-dedi K. Másimov.
Osy oraıda ol densaýlyq saqtaý nysandarynyń máselesi aldaǵy maýsym aıynda taǵy da qaralatynyn eskertip ótti.
