Densaýlyq saqtaý mınıstrliginde vedomstvoǵa qarasty organdarmen selektorlyq keńes ótti
ASTANA. 25 aqpan. QazAqparat - Búgin Densaýlyq saqtaý mınıstrliginde oblystyq densaýlyq saqtaý basqarmalary basshylarynyń, qurylymdyq bólimsheler, iri medıtsınalyq uıymdardyń bas dárigerleriniń jáne vedomstvo komıtetteriniń óńirlik departamentteri dırektorlarynyń qatysýymen selektorlyq keńes ótti.
Keńeste ınfektsııalyq aýrýlar boıynsha respýblıkadaǵy epıdemıologııalyq jaǵdaı jáne ımmýndyq profılaktıka máseleleri, statsıonarlyq kómektiń qoljetimdiligi, «Vremıa» gazetiniń tilshisi V.Býrdınniń maqalalarynda jáne azamattardyń habarlamalarynda kórsetilgen faktilerdi komıssııalyq tekserý úshin qurylǵan jumys komıssııasynyń qorytyndylary qarastyryldy.
Aǵymdaǵy jyldyń 31 qańtarynda Premer-Mınıstrdiń tapsyrmasyna oraı QR Premer-mınıstriniń orynbasary Erbol Orynbaev jáne Densaýlyq saqtaý mınıstri Salıdat Qaıyrbekova «Vremıa» gazetiniń tilshisi V.Býrdınmen kezdesý ótkizgeni belgili.
Ótken kezeń ishinde respýblıkadaǵy epıdemıologııalyq jaǵdaı turaqty boldy. 18 ınfektsııalyq aýrý, onyń ishinde JRVI jáne tumaý boıynsha aýrý deńgeıiniń tómendegeni baıqaldy.
«Salamatty Qazaqstan» memlekettik baǵdarlamasyn júzege asyrý aıasynda respýblıka boıynsha pnevmokokk ınfektsııasyna qarsy kezeń-kezeńmen egý sharalary júrgizilýde. Polıomıelıttiń taralýynyń aldyn alý jáne eskertý maqsatynda aǵymdaǵy jyldyń sáýir-mamyr aılarynda 5 jasqa deıingi balalardy ımmýnızatsııalaýdyń qosymsha ulttyq sharasyn júrgizý josparlanyp otyr.
Sondaı-aq, statsıonarlyq kómektiń qoljetimdiligi máselesi talqylandy. Aǵymdaǵy jyly Portalda 148,7 myń joldama tirkelgen, olardyń 43% aýyl turǵyndaryna tıesili. Josparly gospıtalızatsııanyń problemalyq máselelerin shuǵyl sheshý maqsatynda Portal boıynsha kún saıyn monıtorıng júrgizilip otyrady.
Oǵan qosa, «Vremıa» gazetiniń tilshisi V. Býrdınniń maqalalarynda kórsetilgen faktilerdi tekserý úshin Mınıstrlik janynan qurylǵan jumys komıssııasynyń qorytyndylary shyǵaryldy. Komıssııa anyqtaǵan problemalardy talqylap, sheshý joldaryn belgiledi. Olardyń birqatary qazirdiń ózinde aýmaqtyq densaýlyq saqtaý organdary arqyly júzege asyrylyp jatyr. Jýrnalıst kórsetken barlyq faktiler jiti tekserildi, sondaı-aq, jyldyń basynan beri mınıstrliktiń «shuǵyl jelisine» kelip túsken azamattardyń barlyq aryz-shaǵymdaryna (jalpy sany 500-den astam) komıssııalyq tekserister júrgizildi.
Jumys komıssııasynyń qorytyndylary Premer-Mınıstr Kárim Másimovke usynyldy. Tekserister aıaqtalǵannan keıin QR Densaýlyq saqtaý mınıstrliginiń Medıtsınalyq, farmatsevtıkalyq qyzmetti baqylaý komıteti jáne Memlekettik sanıtarlyq-epıdemıologııalyq qadaǵalaý komıteti óńirlik bólimsheleri jetekshileriniń atqaryp otyrǵan laýazymdyq qyzmetterge sáıkestigi máselesi sheshiletini aıtyldy.
Densaýlyq saqtaý mınıstri S.Qaıyrbekova mınıstrlik janynan qoǵamdyq keńes qurylyp, onyń quramyna Parlament depýtattary, qoǵamdyq, kásipodaq birlestikteri jáne BAQ ókilderi kirgenin habarlady.
