Densaýlyq saqtaý mınıstrliginde «Azamattardy qabyldaýdyń biryńǵaı kúni» ótýde

NUR-SULTAN. QazAqparat - Búgin QR Densaýlyq saqtaý vıtse-mınıstri Kamaljan Nadyrov «Azamattardy qabyldaýdyń biryńǵaı kúni» jalpyrespýblıkalyq is-sharasy aıasynda azamattardy jeke qabyldady, dep habarlaıdy QazAqparat mınıstrliktiń baspasóz qyzmetine silteme jasap.

Túske deıin barlyǵy 30-dan astam adam qabyldandy, sonyń qatarynda beınekonferentsııa arqyly baılanysqa shyqqan Nur-Sultan, Almaty, Shymkent qalalarynyń, Shyǵys Qazaqstan, Jambyl, Atyraý, Almaty oblystarynyń turǵyndary bar.

«Jalpy, ótinishter medıtsınalyq qyzmet kórsetý sapasy, dári-dármekpen qamtamasyz etý, shetelde emdelý, ǵylymı ortalyqtarda medıtsınalyq tekserý, konsýltatsııalyq kómek kórsetý jáne ońaltý, medıtsınalyq personalǵa shaǵymdar jáne basqalar máseleler qaraldy», delingen habarlamada.

Bul is-shara Memleket basshysynyń mindetterin iske asyrý aıasynda ótýde. «Azamattardy qabyldaýdyń biryńǵaı kúniniń» mindeti – azamattardyń naqty áleýmettik máselelerin sheshýge baǵdarlanyp, halyqpen tikeleı dıalogty nyǵaıtý.

Azamattardy qabyldaý qorytyndysy boıynsha vıtse-mınıstr tıisti densaýlyq saqtaý basqarmalarynyń, taýarlar men qyzmetterdiń qaýipsizdigin baqylaý komıtetiniń basshylaryna, Densaýlyq saqtaý mınıstrliginiń qurylymdyq jáne vedomstvolyq baǵynysty bólimsheleriniń basshylaryna máselelerdi sheshý úshin birqatar tapsyrma berdi.

Qabyldaý áli jalǵasýda.

Aıta keterligi, QR Densaýlyq saqtaý mınıstri Eljan Birtanov bastaǵan delegatsııa Ózbekstan astanasynda ótip jatqan Qazaqstannyń medıtsına kúnderine qatysýda.