Densaýlyq saqtaý mınıstrligi jol-kólik oqıǵalarynan zardap shekken azamattarǵa der kezinde kómek kórsetý úshin bıyl 15 reanomobıl satyp alady
ASTANA. 11 qarasha. QazAqparat - Densaýlyq saqtaý mınıstrligi turǵyndarǵa, ásirese shalǵaıdaǵy eldimeken turǵyndaryna medıtsınalyq qoljetimdilikti qamtamasyz etý maqsatynda kólik medıtsınasyn damytý jumystaryn jalǵastyrýda.
Densaýlyq saqtaý mınıstrligi tartqan málimetterge qaraǵanda, bıylǵy jyly jyljymaly medıtsınalyq keshenderdiń jumysy jolǵa qoıylǵaly 98 myń 324 adam medıtsınalyq qyzmetpen qamtylǵan. Sondaı-aq 68 myń 816 dıagnostıkalyq, 46 myń 78 laboratorııalyq zertteýler júrgizilgen. Buǵan qosa mamandar 86 myń 226 medıtsınalyq konsýltatsııalar bergen.
Sondaı-aq mınıstrlik málimetterinshe, elimizde respýblıkalyq baǵyttaǵy joldarynda jol-kólik oqıǵalarynan zardap shekken azamattarǵa der kezinde kómek kórsetý maqsatynda jyl saıyn reanomobılder satyp alynyp otyrady. Bıylǵy jyly mınıstrlik osyndaı 15 kólik satyp almaqshy. Ótken jyly 14 reanomobıl satyp alǵan bolatyn. Búginde elimizdiń aımaqtarynda barlyǵy 17 jyljymaly medıtsınalyq keshender jumys istep tur.
