Densaýlyq saqtaý mınıstrligi ÚEU-larǵa 400 mln. teńgeden astam qarjy bóledi - vıtse-mınıstr

ASTANA. 11 mamyr. QazAqparat - Densaýlyq saqtaý mınıstrligi úkimettik emes uıymdar arasyndaǵy memlekettik tapsyrysqa aǵymdaǵy jyly 400 mln. teńgeden astam qarjy bóledi.

Bul týraly búgin elordada ótip jatqan «Ekologııa. Densaýlyq. Ońaltý» 3-shi bas assambleıa barysynda QR Densaýlyq saqtaý vıtse-mınıstri Erik Baıjúnisov málim etti.

«Ótken jyly úkimettik emes uıymdar arasynda memlekettik áleýmettik tapsyrysqa shamamen 142 mln. teńge bólingen bolatyn. Aǵymdaǵy jyly bul kórsetkish 400 mln. teńgeden astam qarjyny quraıdy», - dedi ol.

Atalǵan qarjy densaýlyq saqtaý salasyndaǵy ózekti problemalardy sheshýge arnalǵan ártúrli jobalarǵa baǵyttalatyndyǵyn atap ótken vıtse-mınıstr: «Ózge vedomstvolardan bizdiń artyqshylyǵymyz, taqyryptardy qaýymdastyqtardyń ózderi usynady. Biz olardy qarap, egerde biz úshin olar qyzyqty ári ózekti bolsa, qoldaý kórsetemiz», - dedi E.Baıjúnisov.