Densaýlyq saqtaý mınıstrligi tumaýdan saqtanýdyń eń tıimdi joly halyqty tumaýǵa qarsy egý ekenin eskertedi
ASTANA. 1 qarasha. QazAqparat - Densaýlyq saqtaý mınıstrligi aptalyq monıtorıng boıynsha aǵymdaǵy jyly jiti respıratorlyq vırýstyq ınfektsııalar men tumaýǵa qatysty epıdemıologııalyq ahýal qalypty ekenin habarlaıdy.
Respýblıka boıynsha JRVI-diń 90 359 jaǵdaıy tirkelip, byltyrǵy jylmen salystyrǵanda 1,3 ese tómen bolyp otyr. Tumaý jaǵdaıy tirkelgen joq.
Saraptaý JRVI-men syrqattanǵandardyń basym bóligin (71,9%) 14 jasqa deıingi balalar quraǵanyn, onyń ishinde 1 jasqa deıingi balalar arasynda 9 658 jaǵdaı (nemese 14,38) tirkelgenin kórsetti.
Zerthanalyq saraptama qorytyndysy boıynsha respýblıka kóleminde tumaý emes vırýstar anyqtaldy (adenovırýstar, rınosıntıtsıaldyq jáne paragrıppozdyq vırýstardyń 1 jáne 3 sanattary), al tumaýdyń A men V túrleri anyqtalǵan joq.
Tumaýǵa qarsy osal toptardy (sozylmaly ókpe, júrek-qan tamyry aýrýlary, ımmýndyq jetispeýshiligi bar eresekter men balalardy, álsiz jáne jıi aýyratyn balalardy, medıtsına qyzmetkerlerin, ınternattyq mekemelerdegi eresekter men balalardy) egý jumystary aıaqtaldy. Jumys berýshiler men jeke tulǵalardyń suraýy boıynsha tumaýǵa qarsy egý jumystary jalǵasýda.
