Densaýlyq saqtaý mınıstrligi tekseris júrgizgen 744 kosmetologııalyq kabınettiń 372-sinde buzýshylyqtar anyqtaldy
ASTANA. Naýryzdyń 16-sy. QazAqparat /Gúlmıra Álıakparova/ - QR Densaýlyq saqtaý mınıstrligi teri jáne shyryshty qabyqqa medıtsınalyq em-domdar jasaıtyn kosmetologııalarǵa júrgizgen tekseristiń nátıjesinde, sanıtarlyq talaptardy buzyp otyrǵan 5 nysannyń isin sotqa jiberip, 123 adamdy jumystan shettetti.
Bul týraly búgin ótken brıfıngte Qazaqstannyń Bas sanıtarlyq dárigeri Keńes Ospanov málim etti, dep habarlaıdy QazAqparat.
K.Ospanovtyń aıtýynsha, búgingi kúni sanıtarlyq-epıdemıologııalyq qyzmetterdiń baqylaýynda teri jáne shyryshty qabyqqa medıtsınalyq qyzmetter jasaıtyn barlyǵy 809 kosmetologııalyq nysan bar. QR Densaýlyq saqtaý mınıstrligi ústimizdegi jylǵy qańtardyń 15-inen bastap eldegi barlyq stomatologııalyq jáne kosmetologııalyq uıymdarǵa júrgizgen tekseristiń barysynda atalmysh nysandardardyń 744-in jiti tekserdi. Onyń 372-sinde nemese 50 paıyzǵa jýyǵynda zararsyzdandyrý talaptarynyń buzylyp otyrǵandyǵy anyqtalǵan.
«Tekseristerdiń nátıjeleri boıynsha 5 nysannyń materıaldary sotqa tapsyryldy, 12 nysannyń jumysy ýaqytsha toqtatyldy, 437 aıyppul salynyp, 123 adam jumystan shettetildi. Sondaı-aq 388 kosmetologııalyq kabınetke buzyshýlyqtardy joıý týraly uıǵarym berildi», - dedi ol.
K.Ospanov atap kórsetkenindeı, aldaǵy ýaqytta anyqtalǵan buzýshylyqtardy joıý boıynsha atqarylyp jatqan jumystardyń barysy tekseriletin bolady. «Al buzýshylyqtardy joıý týraly uıǵarymdardy elemegen stomatologııalyq jáne kosmetologııalyq nysandardyń jumysyn ýaqytsha ne bolmasa múldem toqtatý týraly sheshimder sot arqyly sheshiledi», - dedi ol.
