Densaýlyq saqtaý mınıstrligi ShQO-daǵy bala óliminiń deńgeıiniń joǵary bolý sebepterin anyqtaıdy

ASTANA. QazAqparat - Sońǵy bes jylda Shyǵys Qazaqstan oblysyndaǵy bala ólimi deńgeıi aıtarlyqtaı tómendedi, alaıda respýblıka boıynsha bala ólimi eń kóp oryn alatyn óńir retinde atalyp keledi. Mundaı jan túrshigerlik nátıjeniń sebepterin tabý úshin oblysqa Astanadan sarapshylar toby keledi, dep habarlaıdy YK-news.kz.

Oblystyq densaýlyq saqtaý basqarmasynyń derekteri boıynsha, sońǵy bes jylda óńirdegi bala óliminiń deńgeıi 45 paıyzǵa tómendegen.

«2011 jyly bul kórsetkish 1 000 sábıge 22,1-dń kórsetse, búginde 12,2-ge deıin tómendettik», - dep habarlady oblys ákimdiginiń kezekti otyrysynda oblystyq densaýlyq saqtaý basqarmasy basshysy mindetin atqarýshy Ǵalııa Jýasbaeva.

Birneshe jyldan beri Shyǵys Qazaqstan óńiri respýblıkada sábı ólimi boıynsha tizimde kósh bastap tur.

«Shyǵys Qazaqstan oblysyndaǵy bala óliminiń sońǵy on jyldaǵy kórsetkishi eldegi eń nashar kórsetkishterdiń biri, - dedi ShQO ákimi Danıal Ahmetov. - Bir aıda saraptama jasap, qajetti sharalar baǵdarlamasyn qurýdy tapsyramyn. Al men densaýlyq saqtaý mınıstrimen baılanysyp, máseleni túbegeıli zertteý úshin óńirge keshendi komıssııa jiberýdi suraımyn».