Densaýlyq saqtaý mınıstrligi PTR testileý týraly synǵa jaýap berdi
«Sońǵy 3 kúnde ınternette testileýdiń halyq úshin úlken problemaǵa aınalǵany jazylýda. Alaıda zerthanalardy test jasaı almaıdy dep synamastan buryn myna nársege nazar aýdarýlaryńyzdy suraımyn. Úsh aıda eldegi zerthanalar qýaty táýligine 6 myńnan 30 myń testke deıin artty. Bastapqyda zertteýdi Ulttyq saraptama ortalyǵy ǵana júrgizse, qazir jeke zerthanalar (Olımp, Invıvo, Invıtro jáne t.b.) tartyldy. Medıtsınalyq uıymdar da óz testileýin bastady. Jalpy elimiz boıynsha 50-den astam zerthana jumys isteıdi», - dep jazdy J. Súleımenova facebook paraqshasynda .
Onyń aıtýynsha, zerthana qyzmetkerleri 3 aı boıy táýliktik rejımde jumys istep jatyr. PTR testileý qymbat protsedýra jáne suranys asa kóp bolmaǵandyqtan, mamandar da óte az bolǵan.
«Uıqysyz túnder men úlken júkteme, vırýs juqtyrý qaýpi úlken jerde zerthana qyzmetkerleri úndemeı jumys istep keledi. Vırýs juqtyrǵandary emdelip, qaıtadan qatarǵa qosylady. Dozatormen jumys isteı alatyn, tamshyny durys tamyzatyn laborantty az ýaqytta daıarlaý qıyn, bárine tájirıbe kerek. Analızdi óńdeıtin eń qysqa ýaqyttyń ózi 6-8 saǵat jumysty talap etedi. PTR - jalpy qan analızi emes, bul nýkleın qyshqylynyń bólinýin, vırýstyń genetıkalyq bóligin ustaý úshin kóshirmelerin kóbeıtýdi talap etetin qıyn protsess», - dep atap ótti ortalyq basshysy.
Sonymen birge, maman zerthanadaǵy qural-jabdyqtardyń tehnıkalyq jaǵdaıy máz emestigin aıtty.
«Zaýyttan jańa qural-jabdyq alýǵa da biraz ýaqyt kerek. Úzdiksiz qoldanylyp jatqan quraldar tez eskiredi. Munyń bári zerthana jumysyna yqpal etedi. Zerthanalyq testti medıtsınalyq qyzmetker aýrý belgileri bolǵan jaǵdaıda taǵaıyndaıtynyn umyttyq. Qazir erinbegen adamnyń bári, basy aýyrsa, bıznes-kezdesý ótkizetin bolsa, jumysqa shyqsa test tapsyratyn boldy. Onyń nátıjesin tez shyǵarý úshin araǵa tanysyn salady. KVI zerthanalyq testi mánin joǵaltty jáne ótkizý bıletine aınalyp barady. Dál osy kezde shyn aýyrǵan adamdar zerthanalyq testke jete almaı otyrǵanyn oıǵa alaıyq», - dep jazdy J. Súleımenova.