Densaýlyq saqtaý mınıstrligi men kásipodaq ortaq kelisimge qol qoıdy
Áleýmettik áriptestik sheńberinde qyzmetkerlerdiń eńbek, áleýmettik-ekonomıkalyq quqyqtary men múddelerin, kepildikteri men jeńildikterin qorǵaý maqsatynda 2020-2022 jyldarǵa arnalǵan salalyq kelisim jasaldy.
«Memleket basshysynyń tapsyrmasy boıynsha jyl saıyn medıtsınalyq qyzmetkerlerdiń jalaqysyn kóteretin bolamyz. Qazirgi kúnde dárigerler men meıirbıkelerdiń jalaqysyn kóterý mehanızmi ózgerip kele jatyr. Burynǵydaı memlekettik qaýlymen, QR Densaýlyq saqtaý mınıstrliginiń sheshimimen tikeleı árbir dárigerdiń jalaqysyn bekitý nemese kóterý joq. Qazirgi kúnde MÁMS boıynsha búkil medıtsınalyq klınıkalardyń 60%-y - jeke menshik klınıkalar. Olarǵa tikeleı tapsyrma berýge múmkindigimiz joq. Árbir melıtsınalyq qyzmettiń tarıfin arttyryp, kelisimshartqa engizgennen keıin ary qaraı tek kásipodaqtar emes, memlekettik emes uıymdar baqylaýǵa alýy kerek», - dedi QR Densaýlyq saqtaý mınıstri Eljan Birtanov.
Densaýlyq saqtaý uıymdary bekitilgen kelisim aıasynda qosymsha ústeme aqy qosyp tóleı alady. Kelisim jumys berýshilerdiń ujymdyq jáne eńbek sharttarymen aıqyndalǵan qyzmetkerlerge eńbekaqy tóleý, jumys rejımi, demalys jáne basqa da áleýmettik qoldaý sharalary bóliginde qosymsha jeńildikter men kepildikter berý quqyǵyn shektemeıdi.
«Kásipodaq retinde medıtsına qyzmetkerleriniń eńbekaqysy boıynsha elimiz EYDU memleketterimen salystyrǵanda aıtarlyqtaı artta qalǵanyn moıyndaımyz, biraq atalǵan máseleni sheshýde oń serpin bar. Bul bolashaqqa degen senim men optımızmdi bildiredi», - dedi Qazaqstandyq salalyq densaýlyq saqtaý qyzmetkerleri kásipodaǵynyń tóraǵasy Tájibaı Baqytjan.
Kelisim sheńberindegi erejeler taraptar úshin mindetti bolady, densaýlyq saqtaý uıymdary ujymdyq sharttardy osy qujat negizinde jasaýy tıis.