Densaýlyq saqtaý mınıstrligi medıtsına uıymdaryndaǵy qymbat qural-jabdyqtardyń 130 túriniń iske qosylmaı turǵandyǵyn anyqtady
ASTANA. 27 qarasha. QazAqparat - Elimizdiń Densaýlyq saqtaý mınıstrligi medıtsına uıymdaryndaǵy qymbat qural-jabdyqtardyń 130 túriniń iske qosylmaı turǵandyǵyn anyqtady. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte atalǵan vedomstvonyń basshysy Salıdat Qaıyrbekova málim etti.
Onyń atap ótýinshe, elimizdegi barlyq medıtsına uıymdaryna atalǵan baǵytta arnaıy tekserý jumystary júrgizilgen. «Bizder qural-jabdyqtardyń 130 túri boıynsha faktini anyqtadyq. Materıaldardy Bas prokýratýraǵa jiberdik. Biz satyp alynǵan qymbat qural-jabdyqtardyń jumys istep turǵandyǵyna múddelimiz», - dedi mınıstr. Onyń atap ótýinshe, onyń birneshe sebebi bar. Atap aıtqanda, keı jaǵdaıda atalǵan apparattarmen jumys isteı alatyn mamandar joq bolsa, keıde emdeletin naýqastardyń az bolýyna qaramastan qymbat qural-jabdyqtar satyp alynady. Al, bul oryn alǵan problemalardy joıý úshin mınıstrlik medıtsınalyq qural-jabdyqtardy satyp alý júıesin qaıta qalyptastyrdy. Sonymen qatar medıtsına uıymdary bas dárigerlerinen kelgen ótinimderdiń barlyǵyna da saraptama júrgiziledi.
