Densaýlyq saqtaý mınıstrligi Qazaqstanda «Favıpavır» qalaı qoldanylatynyn túsindirdi

NUR-SULTAN. QazAqparat - Densaýlyq saqtaý mınıstrliginiń Taýarlar men qyzmetterdiń sapasy jáne qaýipsizdigin baqylaý komıteti COVID-19 indetine qarsy 11-shi hattamasyna «Favıpavır» preparaty nelikten engizilgenin túsindirdi, dep habarlaıdy QazAqparat tilshisi COVID-19 taralýy boıynsha vedomstvoaralyq komıssııaǵa silteme jasap.

«Qazaqstan Respýblıkasynyń Densaýlyq saqtaý mınıstrligi COVID-19 indetine qarsy em-dom sharasynyń 11-shi hattamasyn jarııalaǵany jaıly áleýmettik jelide taraǵan aqparat shyndyqqa janaspaıdy. Sonymen qatar vırýsqa qarsy tıisti preparatty tabý - COVID-19 pandemııasyna qarsy kúreste barlyq memlekettiń densaýlyq saqtaý júıesiniń basymdyqqa ıe mindeti ekenin habarlaımyz. COVID-19 indetine qarsy paıdalanylyp jatqan vırýsqa qarsy preparattyń bári de tájirıbelik bolyp sanalady. Ári ol klınıkalyq zertteý aıasynda qoldanylady», - dep habarlaıdy komıtetten.

Buryn bul kórsetkish boıynsha lopınavır/rıtonavır jáne gıdroksıhlorohın sekildi preparattar qoldanylyp kelgen. Alaıda klınıkalyq zertteý nátıjesi olardyń tıimdiligin rastamaǵan. Ol týraly Dúnıejúzilik densaýlyq saqtaý uıymy málimdeme jasaǵan.

«Osy ǵylymı málimetter negizinde lopınavır/rıtonavır jáne gıdroksıhlorohın Sapa boıynsha birikken komıssııanyń 2020 jyldyń 15 shildesindegi sheshimimen Qazaqstannyń da klınıkalyq hattamasynan alynyp tastaldy. Qazirgi ýaqytta klınıkalyq hattamanyń 11-shi redaktsııasy áli shyqqan joq. Sońǵysy – 10-shy redaktsııa (10.2). Oǵan favıpıravır men remdesıvır sekildi vırýsqa qarsy preparattar engizildi. Kóptiń talqysyna túsken favıpıravır 2020 jyldyń 20 maýsymyndaǵy klınıkalyq hattamaǵa kirgizilgen. Ol tek statsıonarlyq deńgeıde qoldanylady», - delingen habarlamada.

Komıtet sonymen qatar álemniń ártúrli memleketinde, sonyń ishinde AQSh-ta, Eýropa elderinde osy preparat boıynsha kóptegen klınıkalyq zertteý júrgizilip jatqanyn habarlaıdy. Tipti keıbir elde zertteý qorytyndysyna sáıkes favıpıravır COVID-19 (Reseı, Túrkııa, Úndistan) aýrýyn emdeıtin preparattar tizimine engizilgen.

«Favıpıravır 2014 jyly Japonııada jasalǵan. Tumaýǵa qarsy preparat retinde resmı túrde qoldanylyp keledi. Sonymen birge qazirgi ýaqytta qazaqstandyq klınıkalyq hattama halyqaralyq úzdik málimetterge sáıkes sımptomdy jáne patogenetıkalyq terapııaǵa basymdyq beredi. Oǵan sáıkes hattamanyń sońǵy redaktsııasy boıynsha ambýlatorııalyq deńgeıde paratsetamoldy, ıbýprofendi, sondaı-aq antıkoagýlıanttardy (rıvaroksoban, apıksaban, dabıgatran) paıdalanýǵa keńes berildi», - delingen komıtettiń habarlamasynda.