Densaýlyq saqtaý mınıstrligi: Karantın rejımi áli de buzylyp jatyr

NUR-SULTAN. QazAqparat – Karantın rejımin buzý faktileri qaı aımaqtarda jıi tirkeledi? Bul suraqqa QR Densaýlyq saqtaý birinshi vıtse-mınıstri Marat Shoranov OKQ-da ótken baspasóz máslıhatynda jaýap berdi, dep habarlaıdy QazAqparat tilshisi.

«Biz aımaqtardaǵy karantın rejıminiń saqtalýyna baqylaý júrgizip kelemiz. Aıtarymyz, karantın rejımi áli de buzylyp jatyr. 17 tamyzdan beri 267 866 nysandy qamtyǵan 60 375 reıd ótkizildi. Onyń ishinde 20 myńynan karantın rejıminiń buzylǵany anyqtaldy. 19406 ákimshilik aıyppul salyndy», - dedi Marat Shoranov OKQ-da ótken baspasóz máslıhatynda.

Ol keltirgen málimetke sáıkes, karantın rejımi kóbine Túrkistan, Almaty, Qostanaı, Shyǵys Qazaqstan oblystary men Almaty, Nur-Sultan qalalarynda tirkelip jatyr.

«Nysandarda negizinen mynadaı faktiler anyqtalady: karantın kezeńinde qyzmetine tyıym salynǵan nysandardyń jumysy, shekteý rejımin saqtamaý, buqaralyq is-shara ótkizý. Atalmysh zańbuzýshylyqtar úshin Ákimshilik quqyq buzý kodeksiniń 425-baby boıynsha 11 285 tulǵaǵa 1,1 mlrd teńgeden astam somaǵa aıyppul salyndy. Jeke tulǵalarǵa jalpy somasy 296,3 mln teńgelik 6912 aıyppul salyndy. Azamattardyń edáýir bóligi qoǵamdyq oryndarda maska rejımin saqtamaý saldarynan aıyppulǵa ilingen», - dedi spıker.

Ol sonymen qatar ákimshilik aıyppuldarǵa qaramastan qyzmetin jalǵastyra beretin nysandardyń ıeleri týraly sóz qozǵady.

«Búgingi tańda «tyńdamaıtyn tártip buzýshylar» tiziminde 254 nysan tur. Olardyń ishinde Nur-Sultanda ornalasqan 56, Shymkenttegi 47, Qostanaı oblysyndaǵy 25 nysan bar. Mundaı kásip ıelerin sanıtarlyq-epıdemıologııalyq qyzmet mamandary isti sotqa joldaýda», - deıdi birinshi vıtse-mınıstr.