Densaýlyq saqtaý mınıstrligi halyqty taǵy da karantın sharalaryn saqtaýǵa shaqyrdy

NUR-SULTAN. QazAqparat – Densaýlyq saqtaý mınıstriniń mindetin atqarýshy Lázzat Aqtaeva koronavırýs ınfektsııasyn juqtyrǵan azamattarǵa medıtsınalyq kómek qalaı uıymdastyrylǵanyn aıtyp berdi, dep habarlaıdy QazAqparat tilshisi.

«Koronavırýs ınfektsııasy boıynsha kúdikpen túsetinderdi ornalastyrýǵa arnalǵan ınfektsııalyq jáne provızorlyq tósek oryndar qarastyrylǵan. Al ınfektsııalyq statsıonarlarǵa koronavırýs ınfektsııasy rastalǵan azamattar jatqyzylady. Qazirgi tańda ol baǵytta 35 226 tósek oryn bar. Onyń 37 paıyzy bos emes. 63 paıyzy – bos. Infektsııalyq statsıonarlarda qazirgi tańda 7 544 ınfektsııalyq tósek orynnyń 75 paıyzynda adam jatyr. Al ınfektsııalyq statsıonarlarda 373 jansaqtaý tósek orny qarastyrylǵan. Olardyń úshten birinde koronavırýsty aýyr kóterip jatqan azamattar jatyr. Elde ókpeni jasandy jeldetýdiń 3 294 statsınarlyq apparaty bar. Ótkir másele týyndaǵan jaǵdaıda olar ınfektsııalyq statsıonarlardaǵy jansaqtaý bólimderine taratylady», - dedi Lázzat Aqtaeva OKQ-da ótken baspasóz máslıhatynda.

Onyń aıtýynsha, koronavırýs ınfektsııasy boıynsha kúdikpen túsetinder ornalastyratyn provızorlyq statsıonarlarda 7 236 provızorlyq tósek oryn bar.

«Qurmetti halaıyq! Karantındik, epıdemııaǵa qarsy sharalardy qatań saqtaýǵa shaqyramyz. Adam kóp jınalatyn oryndarǵa barmańyzdar. Jaqyndaryńyzdy aparmańyzdar. JRVI belgileri anyqtalǵan jaǵdaıda jedel járdemge nemese ýchaskelik dárigerge habarlasý kerek. Balalar men sozylmaly aýrýlary bar qarttarǵa qaraılaý kerek», - dedi Lázzat Aqtaeva.

Eske sala ketsek, buǵan deıin vıtse-mınıstr halyqty sebepsiz PTR-testten ótpeýge shaqyrǵan edi.