Densaýlyq saqtaý mınıstrligi gepatıttiń «S» vırýsyn juqtyrý qaýpin azaıtý úshin talaptardy kúsheıtpek
ASTANA. Qańtardyń 14-i. QazAqparat /Gúlmıra Álıakparova/ - Pedıatrııa ınstıtýtynda leıkemııamen aýyratyn balalardyń gepatıttiń «S» vırýsyn juqtyrý faktisine qatysty daý-damaıdan keıin, QR Densaýlyq saqtaý mınıstrligi, qan tamyryna jasalatyn qandaı da bir protsedýralar kezinde naýqastardy túrli juqpalardan qaýipsizdendirý úshin birqatar sharalardy qolǵa alyp, kórsetiletin medıtsınalyq qyzmetterge talaptardy kúsheıtpek.
Bul týraly búgin atalmysh faktige qatysty tekseris júrgizgen arnaıy komıssııa jumysynyń qorytyndysyna arnalǵan baspasóz máslıhatynda vedomstvo basshysy Jaqsylyq Dosqalıev málim etti, dep habarlaıdy QazAqparat.
Mınıstrdiń aıtýynsha, atqarylatyn júıeli sharalar eki baǵytta bolmaq. Onyń biri - naýqastardy emdeý kezinde olardy túrli juqpalardy juqtyrýdan qorǵaý, ekinshisi - gepatıttiń «S» vırýsyn juqtyrýdyń aldyn alý, sondaı-aq atalmysh vırýstyń «V», «S» túrlerimen jáne leıkemııamen aýyratyn naýqastardy emdeý.
Máselen, qan tamyryna qandaı da bir egý jumystaryn jasaıtyn medıtsınalyq mekemelerde «epıdemıolog» qyzmeti engiziledi. Sondaı-aq, árbir emdeý mekemesinde ınfektsııalyq qaýipsizdikke jaýap beretin komıssııa jumys isteıtin bolady. Sonymen qatar, stomatologııalyq, kosmetologııalyq jáne basqa da qyzmetterdi kórsetetin jekemenshik jáne memlekettik klınıkalarda, operatsııalyq bólimshelerde talaptar kúısheıtilip, respýblıkadaǵy barlyq qan quıý stansylary qandy zararsyzdandyrýǵa múmkindik beretin qurylǵylarmen jabdyqtalatyn bolady.
Ekinshi másele boıynsha, osy jyldan bastap gemoblastozben aýyratyn naýqastardy emdeýge qajetti dáriler bir ortalyqtan satyp alynady. Onkologııalyq jáne radıologııalyq ǵylymı zertteý ınstıtýtynda leıkemııamen aýyratyn eresek jastaǵy naýqastar úshin bólimshe ashylady. Sonymen birge, ústimizdegi jyly Almatydaǵy Pedıatrııa jáne balalar hırýrgııasy ortalyǵynda súıek kemigin transplantatsııalaý bólimshesi jasaqtalady.
