Densaýlyq saqtaý mınıstrligi eskertedi: Qajylyqqa barǵandar qus tumaýynan saqtanýy kerek
ASTANA. 24 shilde. QazAqparat - Musylmannyń bes paryzynyń biri - Qajylyqty óteıtin azamattar Birikken Arab Ámirlikterinde qaýip tóndirip otyrǵan qus tumaýynyń jańa koronavırýsynan saqtanǵandary abzal. Bul týraly búgin Densaýlyq saqtaý mınıstrliginde ótken baspasóz máslıhaty barysynda Memlekettik sanıtarlyq-epıdemıologııalyq baqylaý komıtetiniń tóraǵasy Jandarbek Bekshın málimdedi.
Komıtet tóraǵasy aldaǵy qazan aıynda Birikken Arab Ámirlikterine qajylyqqa baratyn azamattar úshin alańdaıtynyn jetkizdi. «Qazir biz Qazaqstan musylmandary dinı basqarmasyna Saýd Arabııasyndaǵy epıdemıologııalyq jaǵdaı týraly aqparat jiberdik. Arabııada 77 adam osy indetpen aýyryp, sonyń ishinde qyryq adam kóz jumdy. Buryn Saýd Arabııasyna barǵan qazaqstandyqtarǵa mınıngıt vırýsyna qarsy egý júrgiziletin. Endi biz sol eldiń Úkimetinen jańa koronavırýsqa qarsy egý júrgizýdi surap otyrmyz», - deıdi J. Bekshın.
Onyń aıtýynsha, qajylyqqa nıettengender arasynda qart kisiler, densaýlyǵy nasharlaý adamdar táýekelge barmaǵany abzalyraq. «Bul asa qaýipti vırýs. Sondyqtan da, Birikken Arab Ámirlikteriniń bıligi jasaǵan eskertýmen kelisemin: densaýlyǵy nashar, ımmýnıteti tómen, buryn qant dıabeti sııaqty aýrýlarmen aýyrǵan, jalpy, aýyryp júrgen adamdarǵa táýekelge barmaı-aq qoıýlaryn suranamyz. Eń aldymen nıetti azamattar ýchaskelik dárigerge qaralǵany jón», - dedi ol.
