Densaýlyq saqtaý mınıstrligi dáriniń shekti baǵasyna qatysty túsinik berdi
«Halyqtyń dári-dármekke jumsaıtyn shyǵyn somasynyń ósýin tejeý, sondaı-aq baǵanyń negizsiz kóterilýine jol bermeý úshin qazirgi tańda Qazaqstan Respýblıkasyndaǵy kóterme jáne bólshek saýdada jylyna eki ret dári-dármektiń shekti baǵasy bekitiledi. Kóterme jáne bólshek saýdaǵa arnalǵan dári-dármekterdiń shekti baǵasyna toqtalsa, Densaýlyq saqtaý mınıstrliginiń bıylǵy 10 qańtardaǵy buıryǵymen 6 715 dárige shekti baǵa bekitildi», - dedi J.Búrkitbaev Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, bul buıryqta 4 296 (64%) pozıtsııa boıynsha byltyrǵy shekti baǵa ózgergen joq. Al, 1 918-ine (28,5%) qatysty baǵa orta eseppen 30 paıyzǵa ósti, ıaǵnı óndirýshi zaýyttarda preparattar quny qymbattady. 501 (7,5%) dárilik zat boıynsha baǵa orta eseppen 7 paıyzǵa arzandady.
«Tegin medıtsınalyq kómektiń kepildik kólemi aıasynda jáne MÁMS júıesindegi dári-dármektiń naqty baǵasy Densaýlyq saqtaý mınıstrliginiń buıryǵymen 2672 dári-dármekke bekitilgen», - dedi vıtse-mınıstr.
«Dárilik zattarǵa belgilengen shekti baǵany kótergender QR Ákimshilik quqyqbuzýshylyq týraly kodeksiniń 426-baby boıynsha jaýapkershilikke tartylady», - dedi ol.
Budan buryn habarlanǵandaı, qazirgi kezde elimizde 7,5 myńǵa jýyq dárilik preparat pen 11 myńnan astam medıtsınalyq buıym tirkelgen. 2022 jyly dári-dármektiń 117 ataýyna jáne medıtsınalyq zattardyń 164 ataýyna teris qorytyndy jasaldy, ıaǵnı olardyń naryqqa jiberilýine ruqsat berilmedi.
Aıta keteıik, jaqynda senator Aqmaral Álnazarova sapasyz dárilik zattardyń ımportyna tosqaýyl qoıýǵa qatysty usynys aıtty.
