Densaýlyq saqtaý mınıstrligi dári-dármektiń shekti baǵasyn jylyna eki márte teksermek
ASTANA. QazAqparat - Qazaqstanda osy jyldyń sáýir aıynda dári-dármekterdiń baǵasyn retteý týraly zań kúshine engeli jatyr. Zańǵa sáıkes, Densaýlyq saqtaý mınıstrligi dári-dármektiń shekti baǵasyn jylyna eki márte - qańtar jáne shilde aılarynda tekseretin bolady, dep habarlaıdy QazAqparat tilshisi.
«Ózderińiz biletindeı, ótken jyldyń jeltoqsan aıynda Memleket basshysy tıisti zańǵa qol qoıyp, oǵan sáıkes Densaýlyq saqtaý mınıstrligine barlyq dári-dármek boıynsha baǵalardy retteý quzyreti berilgen bolatyn. Atalǵan norma osy jyldyń sáýir aıynda kúshine enedi. Qazirgi ýaqytta jeńil repressıvti sıpaty bar dári-dármekterdiń baǵalaryn retteý erejelerin bekittik. Oǵan saı biz shekti bólshekti baǵalardy belgileıtin bolamyz», - dedi OKQ-da ótken baspasóz máslıhatynda QR Densaýlyq saqtaý mınıstrligi Farmatsııa komıtetiniń tóraıymy Lıýdmıla Bıýrabekova.
Komıtet tóraıymynyń aıtýyna qaraǵanda, dári-dármek boıynsha shekti baǵalardy buzý nemese dárilik zattardyń baǵasyn asyra satý boıynsha erejeni buzǵandar úshin ákimshilik jaza taǵaıyndalady.
«ıAǵnı, jaza sýbekt sanatyna qaraı 70 AEK-ten 1000 AEK-ke deıingi aıyppul mólsherinde bolady. Tipti farmatsevtıkalyq jumysty toqtatýǵa deıingi jaza bar. Bizdiń elde búgingi tańda 8 myńǵa tarta dári-dármek túri satylyp jatyr. Qazir olardyń 5500-niń baǵasy belgilendi. Sonymen birge, júrgizilgen jumys barysynda preparattardyń 10 paıyzy tirkeý kýáligi bolǵanyna qaramastan, elge ákelinip, satylmaǵanyn anyqtadyq. Dese de, bul óndirýshilermen tıisti jumysty júrgizemiz», - deıdi ol.
Lıýdmıla Bıýrabekovanyń aıtýynsha, Densaýlyq saqtaý mınıstrligi dári-dármekterdiń shekti baǵasyn jylyna eki márte - qańtar jáne shilde aıynda (ár aıdyń onyna deıin) belgileıtin bolady. Eki márte tekserý kompanııalarǵa dári-dármekterdiń baǵasyn dáldep alýǵa múmkindik beredi.
«Farmatsııa komıtetiniń basty maqsaty - halyqty qoljetimdi ári sapaly dári-dármekpen qamtamasyz etý. QR aýmaǵynda memlekettik tirkeýden ótpegen dárilik zattar men medıtsınalyq preparattardy satýǵa tyıym salynǵanyn bilesizder. Dári-dármekterdiń memlekettik tirkeýmen bizdiń komıtettiń sarapshylyq uıymy, Ulttyq dárilik zattar men medıtsınalyq buıymdar ortalyǵy aınalysady. Ol uıymdar dárini tirkeý nemese qaıta tirkeý kezinde saraptama protsedýrasyn júrgizedi», - deıdi komıtet tóraıymy.
Lıýdmıla Bıýrabekovanyń sózine qulaq assaq, saraptama úsh kezeńnen turady. Birinshi kezeń - bastapqy, tirkeý qujattamasynyń saraptamasy. Ekinshi kezeń - ǵylymı mamandandyrylǵan saraptama. Ol kezeńde farmatsevtıkalyq jáne farmakologııalyq komıssııa preparattyń tirkeletini nemese tirkelmeıtinin anyqtaıdy. Úshinshi kezeń - laboratorııalyq synaq bolyp tabylady.
