Densaýlyq saqtaý mınıstrligi dári-dármekterdiń janama áserlerin baqylaý sharalaryn kúsheıtedi
ASTANA. 30 shilde. QazAqparat - QR Densaýlyq saqtaý mınıstrligi dárilik zattardyń barlyq janama áserlerine júrgiziletin monıtorıngti kúsheıtýdi josparlap otyr,
dep habarlady densaýlyq saqtaý vıtse-mınıstri Erik Baıjúnisov Pm.kz saıtyna bergen suhbatynda.
«Biz statsıonarlyq jáne ambýlatorlyq deńgeılerde baıqalyp otyrǵan dárilik zattardyń barlyq janama áserlerine qatań monıtorıng júrgizýimiz jáne bul jumysty kúsheıtýimiz kerek. Biz qatań esep jáne baqylaý júrgizýge tıipsiz», - dedi E.Baıjúnisov.
Vıtse-mınıstr sondaı-aq, «dári-dármekter boıynsha saýattylyqty» arttyrý jónindegi sharalardy qarastyratyn qorytyndy qujatta halyqtyń nazary preparattardy tek dárigerdiń keńesi men taǵaıyndaýy boıynsha ǵana qoldaný qajettiligine aýdarylatynyn atap kórsetti.
«Bizdiń aqparattyq ortalyqtarymyz arqyly dárilerdiń janama áserleri týraly halyqty habardar etý, sondaı-aq tek retsept boıynsha satylatyn dári-dármekterdiń tizbesin jasaý jáne halyqty jaýapkershilikke tárbıeleý máseleleri qorytyndy qujatta qarastyrylady», - dep atap kórsetti E.Baıjúnisov óz suhbatynda.
Vıtse-mınıstrdiń aıtýynsha, qazirgi tańda Dúnıejúzilik banktiń bastamashylyǵymen barlyq oblysta dárilik zattardyń janama áserleri anyqtalatyn 16 dárilik-aqparattyq ortalyqtar qurylyp jáne arnaıy aqparattyq saıt ashylyp otyr.
Esterińizge sala keteıik, Elbasy N.Nazarbaev «Qazaqstannyń áleýmettik jańartylýy: Jalpyǵa ortal Eńbek Qoǵamyna 20 qadam» atty baǵdarlamalyq maqalasynda 2012 jyldyń sońyna deıin halyqtyń dárilik zattardy qabyldaýdaǵy saýattylyq deńgeılerin arttyrýdyń tetigin engizý týraly tapsyrma bergen bolatyn.
