Densaýlyq saqtaý mınıstrligi aýyl halqyna arnalǵan pılottyq jobany bastaıdy

NUR-SULTAN. QazAqparat - Memleket basshysynyń tapsyrmasyna sáıkes jáne Prezıdent Ákimshiliginiń úılestirýimen Densaýlyq saqtaý mınıstrligi «Aýyldaǵy densaýlyq saqtaýdy jańǵyrtý» pılottyq jobasyn ázirleýde, dep habarlaıdy QazAqparat.

Vedomstvonyń málimetinshe, p ılottyq joba eki mindetti qamtıdy: Birinshisi, medıtsınalyq pýnkt, FAP, dárigerlik ambýlatorııa sııaqty jetispeıtin bastapqy medıtsınalyq-sanıtarııalyq kómek uıymdaryn salý arqyly barlyq aýyldyq eldi mekenderdi medıtsınalyq ınfraqurylymmen qamtamasyz etý. Ekinshisi, qazirgi zamanǵy kóp beıindi ortalyq aýdanaralyq aýrýhanalardy uıymdastyrý arqyly aýyl halqyna ýaqtyly shuǵyl jáne mamandandyrylǵan medıtsınalyq kómek kórsetý qyzmetin arttyrý.

Birinshi mindetke keler bolsaq, 655 nysandy salýdyń arqasynda shamamen 1 mıllıondaı aýyl turǵynyn bastapqy medıtsınalyq-sanıtarııalyq kómekpen qosymsha qamtý, aýyl halqyna medıtsınalyq kómekti jaqyndatý, aýyldaǵy medıtsınalyq qyzmetterdiń sapasyna qanaǵattaný kórsetkishin arttyrý, MSAK qoljetimdiligin arttyrý (profılaktıkalyq tekserýler, skrınıng, erte anyqtaý), ýaqtyly medıtsınalyq kómek kórsetý, asqynýlardyń aldyn alý sııaqty jetistikterge qol jetkizý múmkindigi kútilýde.

Al ekinshi mindet boıynsha, ıaǵnı qazirgi zamanǵy kóp beıindi aýrýhanalardy uıymdastyrýdyń arqasynda «altyn saǵat» qaǵıdatyn saqtaı otyryp, aýyl halqyna ınfarkt, ınsýlt, jaraqat jáne basqa da jaǵdaılar kezinde shuǵyl medıtsınalyq kómekti ýaqtyly kórsetý, qan aınalymy júıesi aýrýlarynan bolatyn ólim-jitimdi (ınfarkt, ınsýlt jáne t. b.) 20% tómendetý, iri qalalarǵa áýre etpesten halyqqa mamandandyrylǵan jáne joǵary tehnologııalyq medıtsınalyq kómek kórsetý, 4 mln. astam aýyl turǵynyn joǵary tehnologııalyq kómekpen qamtamasyz etý múmkindigi kútilýde.