Densaýlyq saqtaý mınıstrligi áleýmettik mańyzdy jobalardy anyqtaý úshin úkimettik emes uıymdar arasynda konkýrs jarııalady
ASTANA. 12 jeltoqsan. QazAqparat - «Qazaqstan Respýblıkasy Densaýlyq saqtaý mınıstrligi janyndaǵy patsıentterdiń quqyǵyn qorǵaý jónindegi qoǵamdyq keńes 2012 jylǵa arnalǵan memlekettik áleýmettik tapsyrys sheńberinde densaýlyq saqtaý salasynda áleýmettik mańyzdy jobalardy anyqtaý úshin aǵymdaǵy jylǵy 2 jeltoqsanda úkimettik emes uıymdar arasynda úzdik áleýmettik ıdeıalar konkýrsyn jarııalady»,-dep habarlaıdy Densaýlyq saqtaý mınıstrliginiń baspasóz qyzmeti.
Baspasóz málimetterine qaraǵanda, «2012 jylǵa arnalǵan halyq densaýlyǵyn saqtaý salasynda úkimettik emes uıymdarǵa arnalǵan úzdik áleýmettik ıdeıalar» respýblıkalyq konkýrsy - aldaǵy jylǵa arnalǵan memlekettik áleýmettik tapsyrys sheńberinde densaýlyq saqtaý salasyndaǵy áleýmettik mańyzdy jobalardyń taqyrybyn anyqtaýǵa baǵyttalǵan áleýmettik-ımıdjdik is-shara.
Konkýrsty ótkizý tujyrymdamasyna sáıkes ıdeıalar men jobalar halyqty aqparattandyrýǵa, salaýatty ómir saltyn qalyptastyrýdy nasıhattaýǵa, aýrýdyń aldyn alýǵa, jańa bastamalardy endirý boıynsha mınıstrlikke jáne uıymdarǵa qoǵamdyq densaýlyqty saqtaý jáne onyń damýyn nyǵaıtý jelilerin qurýǵa kómek retinde baǵyttalýy tıis.
Konkýrsqa Qazaqstannyń barlyq úkimettik emes uıymdary qatysýda.
QR Densaýlyq saqtaý mınıstrligi janyndaǵy patsıentterdiń quqyǵyn qorǵaý jónindegi qoǵamdyq keńes daýys berý arqyly baıqaý laýreattaryn anyqtaıdy. Osylaısha, 2012 jylǵa arnalǵan áleýmettik mańyzdy taqyryptar tizimin qalyptastyrýǵa qatysty 10-12 úzdik ıdeıa tańdap alynady.
