Densaýlyq saqtaý mınıstrligi 2011 jyly sanıtarlyq avıatsııaǵa 14 tikushaq satyp alady - Vıtse-mınıstr E. Baıjúnisov
ASTANA. 7 jeltoqsan. QazAqparat /Jasulan Amanbaıuly/ - Kelesi jyly Densaýlyq saqtaý mınıstrligi sanıtarlyq avıatsııaǵa 14 tikushaq satyp alady. Búgin bul týraly QR Densaýlyq saqtaý mınıstrliginde ótken brıfıngte vedomstvo vıtse-mınıstri Erik Baıjúnisov málim etti.
Vıtse-mınıstrdiń aıtýynsha, 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń negizinde 2011 jyly respýblıka boıynsha biryńǵaı apattyq jaǵdaılarǵa tap bolǵan adamdarǵa kómek kórsetý júıesi belgilendi. Sol maqsatta sanıtarlyq avıatsııaǵa 14 tikushaq satyp alý kózdelýde.
Olar respýblıka joldarynda oryn alatyn kólik apattaryna shuǵyl is-qımyl jasaýǵa jáne shalǵaıdaǵy turǵyndarǵa kásibı kómek kórsetýge jumyldyrylatyn bolady.
«Sanıtarlyq avıatsııa shalǵaı jerlerge medıtsına qyzmetkerlerin shuǵyl jetkizý, oqıǵadan japa shekkenderdi medıtsınalyq mekemelerge jetkizý, ortalyqtaǵy bilikti mamandardy shalǵaı aýyldarǵa aparyp kelý sııaqty keshendi máselelerdi atqarady. Oǵan qarajat ta bólindi. Endigi másele - biz onyń normatıvtik-quqyqtyq jaǵyn qarastyryp jatyrmyz», dep atap kórsetti ol.
Jalpy, 2011-2013 jyldary «Salamatty Qazaqstan» baǵdarlamasyn júzege asyrýǵa 209,4 mlrd. teńge bólinedi dep mejelengen.
«Jol boıyndaǵy eń qaýipti ýchaskelerinde, aýa raıynyń qolaısyz kezderinde tikushaqpen josparly túrde sholý, jedel járdem kórsetýge baǵyttalǵan dıspetcherlik pýnktter ashý jumystarynyń barlyǵy osy baǵdarlamada qarastyrylǵan», deıdi E. Baıjúnisov.
Elbasy Jarlyǵymen Qazaqstan Respýblıkasynyń densaýlyq saqtaý salasyn damytýdyń 2011-2015 jyldarǵa arnalǵan «Salamatty Qazaqstan» memlekettik baǵdarlamasynyń jobasy 29 qarashada bekitildi.
