Densaýlyq saqtaý mınıstri jedel járdemniń qansha ýaqytta keletinin aıtty

ASTANA. QazAqparat - QR Densaýlyq saqtaý mınıstri Eljan Birtanov jedel medıtsınalyq járdemniń jumysyn ózgertýdi kózdeıdi. Osyǵan oraı, arnaıy buıryq daıyndalyp jatyr, dep xabarlaıdy QazAqparat tilshisi.

«Ashyǵyn aıtý kerek, bizde jedel járdemdi shaqyrǵandardyń basym bóliginde aýrýdyń asqynyp ketýi tirkelgen. Bul degenimiz, turǵyndar aýyryp júrse de, emxanaǵa barmaıdy. Óz densaýlyǵyna durys qarmaıdy. Al aýrý asqynyp ketse, jedel járdem qyzmetin shaqyra bastaıdy. Osynyń nátıjesinde qońyraýlar kóbeıedi, jedel járdemniń jumysy qaýyrt bolady. Álbette, jedel qyzmettiń kelip jetý ýaqyty da uzarady», - dedi Birtanov xalyq aldynda esep berý kezdesýi kezinde.

Mınıstrdiń aıtýynsha, qolǵa alynyp jatqan sharalarǵa qaramastan, jedel medıtsınalyq járdemniń qyzmet kórsetý ýaqyty qysqaratyn emes. Búginde ortasha ýaqyttyń kólemi 31 mınýt qurap otyr. «Al damyǵan memleketterde jedel járdem 15 mınýtta keledi. Bizdegi olqylyqtyń basty sebebin men aıttym. Sol sebepti biz jańa buıryqtyń jobasyn daıyndap qoıdyq. Onda jedel járdemniń naqty qyzmetteri kórsetiledi. Jedel járdem jedel qyzmetpen aınalysýy shart. Biz soǵan kelýimiz kerek», - dep atap kórsetti mınıstr.

Resmı málimetke sáıkes, ótken jyly Qazaqstanda jedel medıtsınalyq járdem qyzmetine 8 mln qońyraý túsken.