Densaýlyq saqtaý mınıstri xalyq medıtsınasyna sene me

ASTANA. QazAqparat - Búginde Qazaqstanda xalyq medıtsınasy memlekettik qyzmetter sanatyna jatpaıdy. Sol sebepti osy salaǵa baqylaý sharalary júrgizilmeıdi. Bul týraly QR Densaýlyq saqtaý mınıstri Eljan Birtanov aıtty, dep xabarlaıdy QazAqparat tilshisi.

"Medıtsınalyq qyzmetterge qatysty naqty standarttar bar. Halyq medıtsınasy oǵan kirmeıdi. Sondyqtan biz ony medıtsınalyq qyzmet dep sanamaımyz. Degenmen, xalyq tarapynan aryz-shaǵymdar tússe, biz tıisti sharalardy qabyldaımyz. Ol úshin qoǵamdyq densaýlyqty saqtaý komıteti bar", - dedi Eljan Birtanov Úkimet otyrysynan keıingi baspasóz máslıxatynda.

Mınıstrdiń aıtýynsha, búginde ǵylymı turǵyda dáleldengen emdeý tásilderi medıtsınalyq qyzmetterge kiredi. Oǵan memlekettiń ózi kepildik beredi.

"Sondyqtan tekseristen ótpegen, kóp jaǵdaıda, qaýipti emdeý sharalary úshin azamattardyń ózderi jaýapty. Halyq medıtsınasynan keıin aýrýdyń asqyný jaǵdaılary bolsa, biz kómek berýge daıynbyz. Aryz-shaǵymdardy da qarastyramyz. Sebebi qoǵamdyq densaýlyqty saqtaý mindeti bizge júktelgen. Ázirshe, xalyq medıtsınasy salasynda qandaı da bir qadaǵalaý, tyıym salý, ıa bolmasa, ruqsat berý boıynsha eshqandaı jospar joq", - dep atap kórsetti E.Birtanov.